Anda di sini

Nancy positif industri dagang temuai deka dibuka tumu

Advertisement
NANCY
NANCY

KUCHING: Menteri Dagang Temuai, Seni enggau Main Asal Datuk Seri Nancy Shukri positif industri dagang temuai di menua tu nyangka deka dibuka tumu kena September ti deka datai.

Ku iya madah, taja pia pekara tu bepanggai ngagai tikas ngasika prosedur operasyen standard (SOP) rayat menua tu empu ari baruh pentin atur nagang pemindah ti dipejalaika perintah.

“Kitai optimis nyangka tu deka dibuka tumu lalu bepanggai ngagai komuniti kitai empu dalam ngasika SOP ti ditetapka.

“Juluk aku empu iya nya kitai nyangka ulih buka tumu kena September tu taja perintah udah ngengkahka juluk kena bulan November muka sektor tu,” ku iya.

Iya bejaku munyi nya lebuh aum media pengudah ngelawa ke Palan Betuchuk Vaksin (PPV) ti diatur Gerempung Dagang Temuai Sarawak (STF) ti sama bisi datai iya nya Menteri Dagang Temuai, Seni enggau Main Asal Sarawak Datuk Abdul Karim Rahman Hamzah ba Palan Ekumenikal Kristian ditu, bedau lama ti udah.

Pia mega ku Nancy, opis menteri nya bulih mayuh peminta ari raban pengemeran industri dagang temuai ngambika sektor tu dinuka kena mulaika pemanah ekonomi sereta industri nya empu.

Iya pechaya, nyema program vaksinasyen perintah ulih dipejalai enggau manah lalu kes positif kena rampit COVID-19 ulih diturunka, tu meri mayuh agi peluang ngagai industri tu ulih dibuka.

“Program vaksinasyen tu kebendar nya strategi timpuh pandak kitai kena ngulihka pechaya, laban mayuh agi ti diberi vaksin nya deka ngurangka kes kena rampit.

“Enggau gaya ti manah agi iya nya imuniti beraban sereta mayuh ti udah kena vaksin, kitai ulih muka garis entara kandang endur dagang temuai kitai ila,” ku iya.

Bekaul PPV ti diatur kededua opis menteri di renggat perintah besai enggau nengeri tu, Nancy madahka tu kena rayat nyikap diri ngambika mayuh agi ti betuchuk vaksin lalu ngelengkaska proses vaksinasyen ti endang udah bisi.

Ku iya, sida ti ba industri dagang temuai mega dalam kategori raban terabai menua lalu tu kena nyikap diri maya muka sektor industri tu ila.

“Program baka tu ila deka dipejalaika di mengeri besai baka Miri enggau Sibu ungkup raban ke dikemeratka kitai di kandang menua nya.

“Kitai meri besai pengaga ati ngagai semua sida ti bekaul sekalika ari industri dagang temuai baka STF, Opis Menteri Pengerai Maaysia, Palan Berubat Timberland, polis sereta semua ejensi bekaul laban ti udah mantu kitai ngemujurka program tu,” ku iya.

Advertisement