Anda di sini

Aum Sarawak, Petronas bekaul sempekat komersial minyak enggau gis agi diteruska

Advertisement
 Sharifah Hasidah lebuh ti ngagihka pemakai maya Program Ngagihka Pemakai Bungkus 2.0 ke diatur Sheda pampang Kuching begulai enggau premis pemakai Mom’s Laksa di Jalai Astana ditu, kemari.
NADAI BEBAYAR: Sharifah Hasidah lebuh ti ngagihka pemakai maya Program Ngagihka Pemakai Bungkus 2.0 ke diatur Sheda pampang Kuching begulai enggau premis pemakai Mom’s Laksa di Jalai Astana ditu, kemari.

KUCHING: Perambu sereta aum bekaul enggau sempekat mutarka chara komersial ti disain perintah nengeri Sarawak enggau Petroliam Nasional Berhad (Petronas) agi diteruska.

Menteri Muda Undang-Undang, Kaul Nengeri enggai Perintah Besai sereta Matau Projek, Datuk Sharifah Hasidah Sayeed Aman Ghazali madah, tu laban bisi sekeda penerang bekaul sempekat nya patut diperundingka lalu ditegika nitihka Sempekat Malaysia 1963 (MA63).

Taja pia, Kaban Kunsil Nengeri (ADUN) Samariang nya madahka, perambu enggau aum entara kededua raban tu bejalai enggau manah.

“Ketegal agi pentin Atur Nagang Pemindah (PKP) diatu, semua nya bisi penanggul mimit. Ukai reti nya aum kitai tu tembu tang kitai enda ulih berandau lalu ngatur pekara tu enggau lengkas nitihka peneka kitai,” ku iya.

Iya madah munyi nya lebuh ti ditanya pengudah bejadika Program Ngagihka Pemakai Bungkus 2.0 ke diatur Gerempung Pemansang Pengawa Berumah enggau Reta Tanah Sarawak (Sheda) pampang Kuching begulai enggau premis pemakai Mom’s Laksa di Jalai Astana ditu, kemari.

Taja pia, Sharifah Hasidah madahka perambu enggau aum agi diteruska lalu dipejalaika enggau manah.

“Kitai suah ngatur aum sereta berandau nengah ‘zoom meeting’ sereta ke bukai,” ku iya.

Nitih ku iya, taja sempekat komersial nya udah dijapai, aspek bejalaika sempekat tu iya nya siti pekara ti bebida.

“Sempekat tu iya nya nama ti udah dipesetuju tang bejalaika nya deka begunaka timpuh sereta aum kena mutarka pekara tu,” ku iya.

Kena Disember taun nyin kemari, Petronas enggau perintah Sarawak udah selubang sepenemu mutarka chara komersial, ti ngemendarka raban kedua tu ngasaika sebagi besai ari pemisi minyak enggau gis tu.

Sempekat tu nentuka penyereta ti chakah ari kompeni ngelumbung minyak enggau gis ti diempu menua iya nya Petroleum Sarawak Berhad (Petros) dalam industri minyak enggau gis.

Petros diatu ngempu hak ngatur penuh sereta hak sentang bekal, nyual enggau ngidarka gis chulin di Sarawak nyengkaum nganjung gas domestik ke rumah, dagang enggau industri.

Advertisement