Anda di sini

Vaksin Cansino engkeman dikena peranak di kandang menua ulu

Advertisement
 Dennis mantu ngerasukka sengkabung idung enggau mulut ngagai siku peranak ti lunggar umur Penan ti keterubah ngena nya maya iya ngelawa ngagai Long Daloh.
KEMERANKA SOP: Dennis mantu ngerasukka sengkabung idung enggau mulut ngagai siku peranak ti lunggar umur Penan ti keterubah ngena nya maya iya ngelawa ngagai Long Daloh.

MIRI: Vaksin dos sekali tuchuk Cansino deka ngelengkaska proses betuchuk vaksin di kandang menua ti jauh di Baram.

Kaban Kunsil Nengeri (ADUN) Telang Usan Dennis Ngau madah, vaksin tu endang beguna kena ngemuntangka peranak kelebih agi raban bansa Penan ulih dituchuk vaksin.

Ku iya nambah, naka diatu orang Penan ti berejista nerima vaksin tu agi mimit laban sida nerima vaksin nengah chara ‘walk-in’.

“Sida enda ibuh pansut dua kali ari genturung pendiau lalu napi ungkus logistik enggau perengka pengangkut ti mar. Tu ulih ngelimatka belanja sereta enda muai hari.

“Tu dikearapka ulih meransang peranak ke diau jauh sereta mea tusah deka pansut ke Palan Betuchuk Vaksin (PPV) ngambika betuchuk vaksin,” ku iya madah ngagai Utusan Borneo, bedau lama ti udah.

Sebedau tu, ku iya, peranak ari kandang menua Ulu Baram ngena belanja urung RM150 ngagai RM300 kena betuchuk vaksin di Long Lama.

Ku Dennis nambah, sitak Telang Usan bisi urung 7,000 iku raban bansa Penan ari 33 buah genturung pendiau lalu majoriti sida tu diau di kandang menua ulu Baram.

“Taja pia enda semua peranak ditu besedia betuchuk vaksin.

“Berindik ari nya ungkup program ‘outreach’ tu ila, aku netapka juluk urung 2,000 peranak nerima vaksin tu,” ku iya.

Pia mega dipelabaka bisi 100 iku Penan deka nerima dos nya di PPV Klinik Pengerai Long Lama, Long San enggau Long Bedian.

Ku Dennis nambah, pengudah vaksin tu datai, raban sida deka bekerejasama enggau Unit Mindah Kin Kitu (Mobile) Vaksinasyen COVID-19 sereta soldadu kena ngelawa ke genturung pendiau ti pemadu jauh ba kandang menua ulu.

Kena Hari Tiga nyin tadi, Chairman Komiti Mutarka Penusah Ngenyit Nengeri Sarawak (JPBNS) Datuk Amar Douglas Uggah Embas madahka, perintah udah minta sepenyampau 650,000 dos keterubah vaksin Cansino ungkup rayat di nengeri tu.

Ku iya, vaksin ti dipelabaka datai ba tengah bulan Julai tu endang beguna ungkup rayat ti diau di kandang menua ulu baka raban bansa Penan ketegal chara vaksin tu di sekali tuchuk ulih mantu ngurangka ungkus logistik sereta perenga pengangkut.

Advertisement