KUCHING: Opis Menteri Dagang Temuai, Seni enggau Main Asal ngarapka pentin atur nagang pemindah di nengeri tu ulih ditenduka kena nentuka sektor dagang temuai ulih bejalaika operasyen.
Menteri opis menteri nya Datuk Abdul Karim Rahman Hamzah madah, tu kelebih agi lebuh Sarawak udah nyapai imuniti beraban tauka 80 peratus rayat ti tau udah kena vaksin datai ba bulan Ogos tu ila.
“Ungkup Sarawak, kitai ngarapka atur nagang pemindah ulih ditenduka mimit kelebih agi pengudah kitai nyapai imuniti beraban ke alai 80 peratus rayat udah dituchuk vaksin.
“Udah tentu kitai dalam sektor dagang temuai deka mansik gaya ninting maya sereta terus bejejaga laban kitai deka meda industri dagang temuai dibuka berindik ari sektor tu udah balat tekeruga.
“Berati ngagai tikas kes (kena rampit) di Sarawk, aku pechaya datai ba ujung taun tu tauka pun taun nyin ila nyangka manah ngagai dagang temuai sekalika Sarawak tauka Malaysia,” ku iya.
Iya madah munyi nya ba aum media pengudah ngelawa Palan Betuchuk Vaksin (PPV) ti diatur Gerempung Dagang Temuai Sarawak (STF) ti disereta Menteri Dagang Temuai, Seni enggau Main Asal Datuk Seri Nancy Shukri ba Palan Ekumenikal Kristian ditu, kilah ensana.
Ku Abdul Karim nambah, sekalika ‘pintu ba garis entara menua’ dagang temuai dibuka tauka enda ngagai temuai menua luar, industri dagang temuai nengeri patut bejalaika operasyen ti ngengkahka juluk nerima temuai di kandang menua tu empu.
Ku iya, nengah operasyen dalam nengeri, tu mega ngemendarka temuai ari miri tauka Sibu datai ke Kuching baka nya mega ke bukai ke alai sida ulih diau di hotel tauka ngemansutka belanja ba palan pemakai sereta ke bukai.
“Taja pia nama ti dikedeka diatu iya nya atur nagang pemindah patut ditnduka mimit baka ngemendarka hotel endur diau, muka kedai makai enggau ke bukai.
“Tu semua nyadika chara enggau nyikap diri sebedau industri tu dibuka terus ngagai peranak menua luar, laban kitai mega deka mulaika pemanah ekonomi sida.
“Pia mega kena nyikap diri, diatu mayuh aktiviti tauka program dagang temuai diatur nengah chara ‘on-line’ kena neruska momentum industri kitai tu bisi dipejalaika,” ku iya nyemetak.
Beserimbai enggau tu, bekaul PPV ti digaga, Abdul Karim madahka tu iya nya program vaksinasyen ti keterubah dipejalaika khas ungkup industri dagang temuai di Malaysia.
Ku iya, tu iya nya diatur kededua opsi menteri dagang temuai di nengeri enggau perintah besai ti nerima kerejesama STF, Opis Menteri Pengerai, Palan Perubat Timberland sereta Komiti Mutarka Penusah Ngenyit Nengeri Sarawak (JPBNS).
“Tuju program tu iya nya nyambut peminta perintah Malaysia enggau ejensi ti bekaul kena meri vaksin ngagai enggau naka pemayuh ti ulih rayat Malaysia enggau Sarawak.
“PPV tu ulih ungkup 2,000 pengemeran industri dagang temuai di Kuching ti bisi program empat hari ke deka tembu Hari Minggu (sehari tu).
“Ba hari keterubah iya nya kena Hari Empat, sida mujur nuchuk 321 iku, Hari Lima urung 500 iku lalu Hari Enam enggau Hari Minggu bela 600 dos,” ku iya.