Anda di sini

Peranak di kandang menua pesisir patut dikemeratka perintah

Advertisement

MIRI: Raban ti patut dikemerat iya nya peranak di kandang menua pesisir dalam pakej bantu ekonomi ke besai ke nyangka deka dipadahka perintah besai dalam timpuh ti deka datai tu.

Dekan Fakulti Kemanusiaan, Pengurusan dan Sains, Universiti Putra Malaysia Kampus Bintulu (UPMKB) Profesor Dr Jayum Jawan madahka bantu ungkup rayat maya ti napi pemar tu endang tanggungpengawa ti patut ba sida ke megai perintah.

“Tu ngayanka penyiru bala ketuai dalam mutarka pemar ke ditapi rayat ketegal mayuh sektor ditutup, kelebih agi dalam ekonomi.

“Nama pan pakej ke dipejalaika, aku ngarapka tu mekuh ngagai peranak di kandang menua pesisir, ti patut dikemerat.

“Rayat betapi enggau mayuh penguji pengidup laban ti enda bekereja, bisi nya ti lenyau pengawa lalu ungkup sida ke kereja gaji diputung tauka dikurangka,” ku iya lebuh ti ditelefon Utusan Borneo ditu.

Bedau lama Menteri Sains, Teknologi enggau Inovasyen Khairy Jamaluddin madahka perintah nyangka deka madahka siti agi pakej bantu ekonomi ke besai enda lama agi.

Iya madah munyi nya lebuh sesi kaul ngatur begulai enggau Gerempung Dagang enggau Industri Menua Malaysia (NCCIM), beserimbai enggau Aum Besai Ninting Taun (AGM) Ke-45 NCCIM ti dipejalaika nengah chara webinar.

Kelimpah ari nya, Menteri Pekara Wang Tengku Datuk Seri Zafrul Tengku Abdul Aziz mega bisi madahka opis menteri iya benung matau sereta mansik enggau silik gaya bantu ke bukai ti deka diberi semanjai Pelin Mulaika Pemanah Menua (PPN) nyengkaum ngena laluh RM100 bilion ari pakej rangsangan ekonomi enggau RM200 bilion ari Bajet 2021 ti bedau dipelanjaka agi.

Jayum ti mega pemegai keterubah Kursi Pemansik Tan Sri Empiang Jabu 2019-2022 ngarapka aktiviti ekonomi patut dibuka baru enggau naka pengelengkas sereta mega ngena chara ti betul ti ngasika prosedur operasyen standard (SOP) ti terit.

“Tu beguna laban nyema ekonomi udah labuh ngagai tikas ti baruh, nya alai proses ngangkatka tu baru deka ngena timpuh ti panjai lalu pengawa tu endang betapi enggau penguji,” ku iya.

Berindik ari nya mih, ku iya madah chara ti manah kena nyamin pengelikun, pengerai sereta pengelantang rayat iya nya enggau ngelengkaska proses vaksinasyen.

“Menua patut nyapai juluk penyampau tauka peratus peranak ti udah kena vaksin ngagai tikas ti likun kena mupuk muka baru sektor ke ditutup laban penyampau tikas kena rampit ti tinggi,” ku iya nyemetak.

Advertisement