MIRI: Empat agi palan vaksinasyen berengkah bejalaika operasyen di kandang menua pesisir Beluru kemari, kena ngemuntangka pengawa nuchik vaksin ti mayuh agi ngagai peranak di kandang menua pesisir.
Kaban Kunsil Nengeri (ADUN) Marudi Datu Dr Penguang Manggil madahka palan tu iya nya Klinik Pengerai Ulu Teru, Klinik Pengerai Long Teran, Klinik Pengerai Long Jegan enggau Klinik Pengerai Long Teru.
“Tiap klinik ti bejalaika operasyen tu ngembuan kapasiti 100 dos betuchuk ninting hari.
“Berindik ari nya aku ngansak peranak ti bedau betuchuk datai ke klinik ti besemak. Anang kakang ati,” ku iya lebuh ti ditelefon Utusan Borneo kemari.
Dulu ari nya dalam media rama madahka, pengawa muka mayuh agi klinik nuchuk vaksin tu iya nya siti ari strategi perintah nentuka peranak di kandang menua pesisir enda tinggal arti program vaksinasyen COVID-19 menua.
“Tu endang beguna dalam nyapai juluk kitai ti dekaka imuniti beraban ke mungkur semua lalu ulih nyaga peranak di kandang menua pesisir ari pandemik COVID-19,” ku Penguang.
Iya ti mega Menteri Muda Kandang Menua beterima kasih ngagai Opis Menteri Pengerai Malaysia (KKM), Opis Pelilih Menua sereta Ketuai Komuniti enggau Ketuai Bansa ti udah bebendar ngemujurka operasyen betuchuk vaksin tu di Marudi.