SIBU: ‘Coastal Bus’ tauka bas mini deka dikena nyadi Palan Betuchuk Vaksin (PPV) Mobile di Sibu, ku Pengatur Komiti Mutarka Penusah Ngenyit Bagi Menua (JPBB) Sibu Dr Annuar Rapa’ee.
Ku iya madah, batang tuju servis tu dipejalai iya nya kena nyungkak mayuh agi peranak di Sibu betuchuk vaksin COVID-19 sida.
Ku iya nambah, bas tu deka diubah nyadi ‘Bas Betuchuk Vaksin’ ti keterubah di Sibu lalu tu deka ngelawa kandang menua di genturung pendiau tauka ke jauh ditu.
“Batang tuju kitai ngadaka servis tu iya nya kena meri perengkaguna ngagai sida ti enda ulih datai PPV sereta mega nyangka ungkup sekeda ti bedau ngaga pemutus sekalika deka betuchuk vaksin.
“Nya alai, lebuh bas tu datai ke genturung pendiau tauka ngagai sekeda kandang menua, nyangka sida lalu deka betuchuk vaksin,” ku iya lebuh ti ditemu pengarang berita maya ti meresa gaya bas mini nya di PPV Mobile ba Balai Lakis, kilah ensanus.
Menteri Muda Kandang Menua enggau Pengawa Berumah nya madahka, servis bas mini tu nyangka deka berengkah bejalaika operasyen dalam minggu ti deka datai tu pengudah pengawa ngubah bas nya tembu.
Beserimbai enggau tu, iya beterima kasih ngagai Pemancha Datuk Jason Tai ti mega Direktor Pengatur Pansar Berhad laban ti udah nyanggup minjauka seunit bas mini tu ti nyadi unit PPV Mobile di kandang menua Sibu.
Ku iya madah, perengka pengangkut baka bas mini tu engkeman dikena laban ti ulih tama ke kandang menua ti jauh sereta jalai ti mit.
“Naka diatu, program vaksinasyen di Sibu dipejalaika enggau manah. Tu (bas mini) semina siti servis tambah ngagai program vaksinasyen di Sibu naka ke diatu,” ku iya nerang.
Iya mega nambah, madahka servis ambulans deka sama dipejalaika nyempulang bas mini tu.
Ungkup tuju tu, ku iya, iya deka minta kerejasama ari raban Gerempung Bulan Sabit Merah (PBSM).
Kelimpah ari nya, ku iya nandu, batang tuju servis tu diadaka mega kena ngemuntangka mensia mayuh betuchuk vaksin sida ngagai barang sapa ke udah lepas ari timpuh atur semaya.
“Nyangka bisi ti tinggal timpuh atur semaya sida laban nyema lepas timpuh atur semaya ari MySejahtera tu, sida deka lubah betuchuk vaksin.
“Nya alai enggau pemisi bas mindah kin kitu tu, sida tu ulih disengkaum kitai terus,” ku iya.
Dr Annuar ti mega Kaban Kunsil Nengeri (ADUN) Nangka mega bisi ditanya bekaul kapasiti vaksinasyen ke ulih dipejalaika ngena servis bas mindah kin kitu tu.
“Aku ngelangkar dalam operasyen tu, tiap kali bas tu ngetu kitai deka nyendiaka kupon. Ambika chunto, ba sebuah palan nya kitai deka nyendiaka 100 kupon.
“Nya alai 100 iku mih ti deka dituchuk vaksin lebuh bas tu singgah di kandang menua nya. Nyema lebih ari 100 iku, kitai deka datai baru hari siti nya,” ku iya.
Ku iya nambah nambah, mensia mayuh deka dituchuk vaksin dalam bas laban dalam bas tu ti kondusif agi sereta lantang.
“Pia mega bas enggau pemesai tu ulih enggau dua iku sekali timpuh betuchuk vaksin,” ku iya nandu.
Ku iya nerang, perambu ngena kupon tu kena nyidi sida ti tinggal dalam bulih vaksin tauka sida ti bedau berunding deka betuchuk vaksin.
Berindik ari nya, iya deka bekerejasama enggau Kejiranan Rukun Tetangga (KRT), Komiti Pemansang enggau Pengelikun Genturung Pendiau (JKKK) sereta organisasyen di kandang menua nya kena ngiga peranak ti bedau betuchuk vaksin.
“Nyema bisi lebih, kitai deka muka ungkup orang bukai, tang kapasiti ti dilangkar aku iya nya ungkup 50 ngagai 100 iku sehari,” ku iya nyemetak.