Anda di sini

Sida ti ada di Sarawak, nadai MyKad mega deka dituchuk vaksin

Advertisement
 Abang Johari disempulang Uggah ngerandau sida ti datai betuchuk vaksin ba PPV industri kemari. — Gambar Chimon Upon
NAMA BERITA: Abang Johari disempulang Uggah ngerandau sida ti datai betuchuk vaksin ba PPV industri kemari. — Gambar Chimon Upon

KUCHING: Kepala Menteri Datuk Patinggi Abang Johari Tun Openg besemaya iya nya sida ke ada di Sarawak tang nadai ngembuan kad pengelala (MyKad) deka bela di sengkaum dalam Program Iminisasi COVID-19 Menua (PICK).

Iya madah sida ti nadai MyKad patut minta diri disengkaum nengah ketuai komuniti ngambika ulih enggau betuchuk vaksin.

“Enti kita nadai kad pengelala, perintah tetap deka meri vaksin nya laban ketuai pupu bansa nemu kita diperanakka ditu. Semina pengawa ke patut digaga kita, iya nya betemu enggau ketuai komuniti ke semak enggau kita lalu ngambi penerang nya ba sida,” ku Abang Johari madah ba aum media pengudah ngelawa Palan Betuchuk Vaksin COVID-19 Longi Industri di Samajaya High Tech Park ditu, kemari.

Ba aum media nya mega, Sapit Kepala Menteri ti mega nyadi chairman Komiti Mutarka Penusah Ngenyit Nengeri Sarawak (JPBNS) Datuk Amar Douglas Uggah Embas madahka perintah nengeri bisi chara ngemutarka pengawa meri vaksin nya ngagai sida ke nadai MyKad.

Uggah nandu baru madahka nengeri tu deka ngerembaika program vaksinasi nya pengudah industri nembuka PPV ngagai bala pengereja pengawa dalam sektor nya.

“Udah abis PPV industri tu ila, kami deka ngelawa kompeni kebun bedandang besai di menua tu,” ku iya.

Ba atur pengawa di Longi kemari, Abang Johari mega meri terima kasih ngagai semua raban volunteer ke udah mantu Sarawak ngenyampatka proses betuchuk vaksin di menua tu.

Iya mega meri terima kasih ngagai semua rayat Sarawak ke udah meri timbal ke manah ngagai program vaksinasi tu.

Iya mega ngingatka rayat nengeri tu terus betatika prosedur operasyen standard (SOP) baka ngena sengkabung mulut enggau idung taja pan udah betuchuk.

“Aku udah nembuka dua dos tuchuk vaksin tang aku agi ngena sengkabung mulut enggau idung. Kitai mesti betatika disiplin kitai empu sereta betatika seraka fizikal. Tu aja chara kitai ngelaban COVID-19,” ku iya.

Advertisement