Anda di sini

Pengelekai Varian Delta nyangka ari PATI ti datai ke nengeri tu

Advertisement
MASING
MASING

KUCHING: Sapit Kepala Menteri Tan Sri Datuk Amar James Jemut Masing irauka penambah kes baru COVID-19 ti ngaul Varian Delta ari menua India ti nyangka deka ngelekai ari peranak menua luar ti datai nadai pemendar (PATI) ke nengeri tu.

Ku iya madah, tu berindik ari pengelekai kes COVID-19 ti ngaul varian tu bisi ditemu di Jawa Tengah, Indonesia baka ti diripot sebuah portal berita ti lalu ngujungka kandang menua nya enggai enda pan ditutup.

“Nama ti ngirauka aku iya nya nitih ku Raban Soldadu Malaysia (ATM), Pasukan Gerakan Am (PGA) enggau Opis Imigresyen ti bejalaika tanggungpengawa nyaga pengelikun garis entara menua kitai enggau Indonesia, bisi ngeripotka PATI ti tama nengah nengah beratus iti ‘jalai chit’, pengudah sida diburu pulai sida datai baru dua tiga hari pengudah nya,” ku iya dalam penerang kemari.

Masing ke mega Chairman Komiti Nyaga Pengelikun Sarawak madahka, sekeda ari PATI ti ngaga penyalah ke sama tu iya nya penatai asal ari Jawa ti nyadi menua ke semak enggau pulau nya ke alai Variant Delta bisi ditemu.

Ku iya, PATI tu ulih nyadi orang ke ulih mai variant COVID-19 ti munuh tu ke Sarawak

“Tu mesti ditagang ngena nama pan chara. Nya alai kitai patut nyaga beratus iti jalai chit. Aku udah minta ATM, PGA enggai Imigresyen ngambika terus bejejaga,” ku iya nyemetak.

Bepelasarka ripot nya, kena 17 Jun 2021, bisi 12,624 kes baru ditemu ba Jawa Tengah lalu ari penyampau tu, 107 kes iya nya Varian Delta ari India ke jai agi lalu jampat agi ngelekai ke alai seminggu sebedau tu, semina 32 kes Varian Delta dirikodka.

Ku iya nyemetak, gaya tu udah ngasuh Presiden Indonesia Joko Widodo minta 700,000 vaksin seminggu lalu sejuta vaksin sebulan kena ngelaban igi penyakit nya.

Beserimbai enggau nya, Masing madahka, ATM, PGA enggau Imigresyen udah bebendar bejalaika tanggungpengawa sida ti udah nangkap mayuh PATI dalam timpuh beberapa bulan tu.

“Taja pia, tu ukai siti pengawa tu nyamai. Kitai udah meri mutosikal bansa Scrambler tauka ATV, dron beteknologi tinggi sereta perengkaguna telekomunikasyen ngagai raban pengelikun tang penama PATI agi terus nyadi.

“Kebuah pia, laban palan jalai chit ti suah berubah ninting hari pengudah sida tu ditemu,” ku iya.

Pia mega ku iya nandu, iya kala meri perambu ngaga pagar ba palan ti strategik di geris entara menua di nengeri tu laban ti irauka pengelekai igi penyakit COVID-19.

Taja pia, ku iya nerang, perambu tu dikelese parti penyakal sereta sekeda penguna media rama.

Advertisement