Anda di sini

Pengawa ngambi pengajar ‘one-off’ patut meri peluang ungkup pengajar subjek Jaku Iban

Advertisement

MIRI: Gerempung Dayak Miri (DAM) minta Opis Menteri Pelajar Malaysia (KPM) nentuka pengawa ngambi khas pengajar chara ‘one-off’ patut meri peluang ngisi puang ungkup pengajar subjek Jaku Iban.

DAM nengah siti penerang media kemari madahka, raban sida ngarapka KPM mega bebendar ngemeratka isu kurang pengajar subjek Jaku Iban di Sarawak.

“Kami dipadahka nengah pansik ti udah dipejalaika (Kajian Pasaran: Berdasarkan laporan Penilaian Akreditasi Penuh MQA-02 Program Ijazah Sarjana Muda Perguruan (PISMP) Bahasa Iban Pendidikan Rendah Ambilan Jun 2015 Institut Pendidikan Guru Kampus Sarawak), ngayanka peminta pengajar Jaku Iban di sekula primari di Sarawak ba taun 2021 iya nya bisi 2,132 iku, lalu 117 iku pengajar diguna ba sekula sekondari.

“Penerang tu diambi enggau rasmi ari KPM, Opis Pelajar Nengeri Sarawak (JPN Sarawak), Universiti Pelajar Sultan Idris (UPSI), Palan Pematih Pengajar (IPG) Kampus Rajang, IPG Kampus Sarawak enggau IPG Kampus Batu Lintang.

“Berindik ari nya, kitai ngarapka bisi puang nya ungkup pengawa ngambi 18,702 tu ila ti bisi nangkup pengurang pengajar subjek Jaku Iban tu,” ku iya nerang.

Pia mega ku DAM, nyema bisi puang nya ditejuka, tu deka tusah nentuka Jaku Iban (betulis enggau jaku mulut) ulih dikenang raban nembiak rebak baru, ukai semina nyadi jaku dikena besehari-hari tang mega nyadika sebuah tradisyen.

“Pia mega, kitai minta KPM ngemeratka graduet IPG enggau graduet degree nyadi pengajar ari institusyen ti sah kena ngisi pengawa puang ke bisi tu,” ku iya.

Ku DAM nerang, kena mutarka penanggul kurang pengajar di Sarawak, raban sida mega ngarapka peranak Sarawak dipilih kena ngisi pengawa puang ke bisi di nengeri diri empu.

“Tu kena nyeliahka pengajar ari nengeri bukai ngambika ngaga peminta pindah pulai ke nengeri diri empu pengudah meri servis di Sarawak dalam sekeda timpuh.

“Pengawa ngambi pengajar di nengeri diri tu mega ulih ngurangka ungkus pemindah pengajar tu empu,” ku iya.

Ba pekara ke sebaka mega, ku DAM nambah, raban sida mega minta ngambika penyampau nembiak nitihka kus ba palan pematih pengajar dalam Jaku Iban ulih ditambah ngagai naka enda 100 iku ninting taun.

“Tu kena nentuka nadai penanggul kurang pengajar Jaku Iban jemah ila,” ku penerang nya nambah.

Advertisement