KUCHING: Rayat di nengeri tu naka kediatu udah nerima tuchuk urung 1.025 juta dos vaksin COVID-19 enggau 40 peratus ari peranak Sarawak udah nerima tuchuk vaksin dos keterubah.
Kepala Menteri Datuk Patinggi Abang Johari Tun Openg madah, juluk deka nuchuk vaksin ngagai semua rayat di Sarawak dikearapka ulih digaga datai ngagai bulan Ogos baka ke udah diperambuka nengah Program Imunisasi COVID-19 Menua (PICK).
Ku iya, Sarawak enggau naka ulih ngenyampatka program nya ngambika ulih mungkur tiap iku mensia mayuh di nengeri tu, nyengkaum sida ke diau ba kandang menua pesisir enggau di kandang menua ulu, nengah chara nganjung raban vaksinasyen ngagai tiap sukut nengeri tu sereta muka Palan Betuchuk Vaksin (PPV).
“Urung sejuta dos udah diberi naka kediatu, lalu dikearapka kitai ulih nyapai juluk kitai bulan Ogos tu ila,” ku iya madah ba aum media pengudah ngelawa PPV Industri Longi di Samajaya High Tech Park ditu, kemari.
Abang Johari mega bisi madahka perintah nengeri Sarawak enggau Komiti Mutarka Penusah Ngenyit Nengeri Sarawak (JPBNS) udah mutuska deka muka mayuh agi PPV industri laban beratika pengelekai kluster COVID-19 ti suah nyadi ba endur gawa.
Iya madah urung 25 kluster baru bisi bekaul enggau pengelekai penyakit nya entara 29 Mei enggau 24 Jun, mungkur urung 1,765 kes.
Di Sarawak ku iya, urung 46,888 pengereja pengawa di nengeri tu diperatika sebagi ari mensia mayuh ke kereja dalam industri ngaga barang di Sarawak, lalu di Samajaya aja ku ya, bisi dalam 12,604 iku.
Iya madah penyampau nya aja meri pengirau ati ngagai sida ke gawa ba sektor tu, ke dipelabaka bisi kena rampit pengelekai penyakit COVID-19, lalu tau mai virus nya ngagai ruang bilik sida iya empu.
“Peratika kita ruang bilik tauka rumah ba kandang menua Samajaya ditu, bisi genturung pendiau baka Kampung Tabuan sereta genturung pendiau bukai. Nyema sida tu kena rampit, sida iya mega ulih ngerampit orang bukai,” ku iya.
Abang Johari mega meri terima kasih ngaga kompeni di Samajaya, nyengkaum Longi, ke pengeransing pengawa sida muka PPV kena nyaga orang ke gawa ba kompeni nya sereta kaul kompeni nya maya pandemik baka tu.
Iya nandu baru madahka, bisi lima kompeni besai di Samajaya baka Longi, Western Digital, X-Fab, Taiyo Yuden enggau IIjin udah nyanggup inisiatif vaksinasi tu.
“Aku bisi ngelawa Samalaju minggu siti nyin tadi. Press Metal udah muka PPV dia lalu dipelabaka urung 10,000 pengereja pengawa kompeni nya deka betuchuk vaksin,” ku iya.
Ba pekara ke sebaka nya mega, Abang Johari madahka raban berubat mindah kin kitu (Mobile medical teams) udah di anjung ngagai kandang menua pesisir nyengkaum Mulu enggau Ba’Kelalan ke deka nuchuk vaksin ngagai mensia mayuh di kandang menua pesisir.
Kelimpah ari nya, iya mega madahka di Kapit, udah mujur nuchuk vaksin ngagai urung 21.6 peratus mensia mayuh ke diau di pelilih menua nya.
PPV Longi ke berengkah dibuka ensanus (24 Jun) deka di buka ngagai Hari Minggu tu (27 Jun) nuchuk vaksin ngagai pengereja pengawa sereta kaul kompeni nya, nyengkaum kompeni bukai dalam kandang Samajaya.
Juluk kompeni nya dipelabaka deka nuchuk urung 2,724 iku mensia mayuh dalam kandang empat hari nya.
Sama bisi enggau nyempulang Kepala Menteri ngelawa Longi kemari, Sapit Kepala Menteri ti mega nyadi chairman JPBNS, Datuk Amar Douglas Uggah Embas, penyanding penemu JPBNS, Dato Sri Dr. Sim Kui Hian, enggau Menteri Muda Pengawa Dagang Entarabansa, Terminal Industri, enggau Pemansang Orang Dagang, Datuk Mohd Naroden Majais.