Anda di sini

Vaksinasyen: Chara baru benung diuji ba palan ke benung diteritka PKPD

Advertisement
 Chara baru dikena raban pengereja pen gawa mobile nuchuk vaksin ba peranak Kampung Sinar Budi ti mengkang alai neritka PKPD. — Gambar Facebook Dr Sim
CHARA BARU: Chara baru dikena raban pengereja pen gawa mobile nuchuk vaksin ba peranak Kampung Sinar Budi ti mengkang alai neritka PKPD. — Gambar Facebook Dr Sim

KUCHING: Buah penemu ti deka nuchuk vaksin ba orang ti benung dalam kandang endur diteritka Atur Nagang Pemindah Diteritka (PKPD) sebedau abis timpuh kuarantin, mengkang ba tikas nguji.

Menteri Kaunsil Kandang Menua enggau Pengawa Berumah Dato Sri Dr Sim Kui Hian madah, Opis Pengerai Nengeri Sarawak mesti ngaga ‘post mortem’ bekaul pekara nya.

Kebuah pia ku iya,laban bisi pemar ke ditapi nyengkaum pemindah bekaul enggau orang sereta ngaduka utai ke dikena ba mayuh bengkah palan PKPD.

“Opis Pengerai Nengeri mesti ngaga ‘post mortem’ ba pekara nya laban mayuh pemar ditapi kelebih agi enti nya bekaul enggau  beribu iku,” ku iya madah ngagai Borneo Post ditu,kemari.

Dulu ari nya, Dr Sim nengah utai tulis ba Facebook iya madahka chara nuchuk vaksin ba peranak ti udah tembu dikuarantin PKPD dikearap ulih ngurangka kes betandu nyadi ba endur ke sama.

Ku iya, pengawa nguji keterubah udah dipejalaika ba Kampung Sinar Budi Baru di Batu Kawa ditu kena malam Hari Tiga.

“Pengawa nuchuk vaksin ba orang ke patut dalam MySejahtera udah dipejalaika ba peranak ti benung diteritka PKPD di Kampung Sinar Budi Baru, ngudah peresa PCR COVID-19 kedua sida negatif.

“Kami ngarapka chara baru tu (vaksin sebedau abis timpuh kuarantin PKPD) ulih ngurangka kes betandu nyadi ba endur ke sama..tu pengawa nguji ti keterubah endar,” ku iya.

Ku iya, bisi 358 vaksin udah dituchuk kurang ari empat jam, iya nya nengah nguji chara baru.

Ku iya, raban orang ti bejalaika pengawa nya ngelawa peranak dia enti dibandingka enggau chara peranak menua datai ngagai sida.  

“Pemujur ke bebida semina ulih dijapai nengah chara beraban baka ari bala volunteer, lutur, Indu misi, Unimas, Gerempung Ukai Dikuasa Perntah (NGO) enggau staf ti bejalaika pengawa ari Klinik Pengerai Batu Kawa,” ku iya.

Ku iya, entara ke pemadu besai reti iya nya diberi peluang nuchuk vaksin ba siku indu orang lunggar umur ke beumur 99 taun.

Advertisement