KUCHING: Sapit Kepala Menteri Tan Sri Datuk Amar (Dr) James Jemut Masing madah, ulah sekeda menua industri ti ‘ngelalaika’ vaksin maya pandemik tu,ulah menua ke kering nekan menua ke lemi.
“Aku nyukung penerang Menteri Sains, Tenologi enggau Inovasyen Khairy Jamaluddin Abu Bakar (KJ) ti madahka ulah sekeda menua industri ngelalaika vaksin maya pandemik pengerai global diatu, nadai moral sereta jai.
“Aku setuju enggau KJ, tang ba aku ngelui agi ari nya, ulah nekan ti dikereja iya ke kering ngagai ke lemi,” ku iya nengah penerang berita kemari.
Masing ke mega Menteri Infrastruktur enggau Pemansang Penyangkai Kapal madah, maya koronavirus ditemu nya ukai ari menua ke seranta tang menua kedua pemadu kaya di dunya, iya nya China.
Nya alai ku iya, menua China enggau sekeda menua maju ke bukai mesti sanggup bekunsika pengelandik enggau chara kena mantu sekeda menua kurang maju ngelaban COVID-19.
“Semadi mih sekeda menua maju tu sanggup bekunsika pengelandik sida sereta badu ngelalaika vaksin kena ngemunaska COVID-19 ari munuh pengidup enggau ekonomi sekeda menua ke seranta, tau nyadi ba peragam menua madahka deka ngemunaska menua seranta, ti ngujungka ngenanka dominasi dunya.
“Nya engka didinga bisi masuk akal, enti kitai berundingka mayuh pemar ke ditapi bebarapa bulan lalu maya ngulihka vaksin,” ku iya.
Ku iya baru, “Kitai patut nyadi rayat Malaysia ke tulin sereta taluk, beri mih sukung ngagai Khairy, perintah PN (Perikatan Nasional) enggau GPS (Gabungan Parti Sarawak) ba pengawa ngelaban penyakit ti tau nyawa lesi tu.
“Anang mih kitai nyadi penagang! Pengawa kitai nyaga menua nadai kekini enti kitai semua parai magang.”