Anda di sini

PPV di Nanga Tada ditangguhka dulu

Advertisement

SIBU: Opis Pengerai Bagi Menua Sibu nangguhka Program Betuchuk Vaksin di Balai Penghulu Seribu, Skim Berumah Baru Nanga Tada, Kanowit ti nundaka nya dipejalaika pegila enggau lusa.

Sapit Menteri Pengerai Datuk Aaron Ago Dagang madah, tu berndik ari kes positif COVID-19 ti ditemu bisi ngelekai ba peranak di genturung pendiau berumah baru nya.

Aaron madah, aktiviti nyidi kes aktif (ACD) deka dipejalaika kena nentuka pengawa nasat enggau meresa kontak semak dipejalaika.

“Nadai peranak ti tekeruga berindik ari pemutus nangguhka program tu laban sida endang bedau nerima tuchuk vaksin COVID-19.

“Program PPV nya deka ditukar ngagai kandang menua Bawan, Kanowit ngambika peranak ari kandang menua Jalai Semaram, Mapai enggau Woh ulih kena tuchuk vaksin.

“Kelimpah ari Bawan, peranak di kandang menua Pidai, Tuah, Jih, Dap sereta rumah panjai besemak mega bedau dituchuk dos vaksin COVID-19,” ku iya lebuh ti ditelefon, kemari.

Aaron ke mega Kaban Parlimen Kanowit sama madah, program vaksinasyen di kandang menua Jagau deka dibantu Raban Soldadu Malaysia (ATM).

Pia mega peranak di Machan enggau Ngungun udah 100 peratus nerima dos keterubah tuchuk vaksin.

“Ba Balai Komuniti Pelilih Menua Kanowit, program vaksinasyen dipejalaika ninting hari ungkup peranak di kandang menua pasar Kanowit enggau rumah panjai ti besemak,” ku iya.

Ku Aaron nyemetak, raban sida nengah KKM seruran bebendar tuka nadai rayat nengeri tu ti kena tinggal ari betuchuk vaksin COVID-19.

Advertisement