Anda di sini

PKRC Balai Komuniti Taman Harmoni berengkah beoperasyen kena 23 Jun

Advertisement
 Harden (kanan) berandau enggau sekeda temuai dipebasa ke datai maya program bejadi PKRC Balai Komuniti Taman Harmoni Sri Aman.
BERANDAU: Harden (kanan) berandau enggau sekeda temuai dipebasa ke datai maya program bejadi PKRC Balai Komuniti Taman Harmoni Sri Aman.

KUCHING: Palan Kuarantin enggau Berubat Risiko Baruh (PKRC) Balai Komuniti Taman Harmoni di Sri Aman berengkah bejalaika operasyen Hari Tiga tu tadi pengudah pengawa ngangkatmanah tembu kena 20 Jun nyin tadi.

Menteri Muda Pengelantang Komuniti Datuk Francis Harden Hollis madahka PKRC tu iya nya ti kedua ari baruh Sepital Sri Aman enggau kapasiti 100 iku pesakit.

PKRC keterubah ari baruh Sepital Sri Aman ku iya dibuka ba Stadium Tetutup Komplek Lumba enggau Main Sri aman enggau kapasiti 210 iku pesakit.

“Berindik ari pengawa begulai, kereja ngangkatmanah balai tu ti nyadi PKRC udah tembu lalu berengkah nerima pesakit COVID-19 kena Hari Tiga (23 Jun).

“Aku ngarapka PKRC tu ulih ngangakatka perengkaguna lalu ngemanahka pengawa ngatur pesakit COVID-19 di Sri Aman tu,” ku iya.

Harden ke mega Kaban Kunsil Nengeri (ADUN) Simanggang madah munyi nya lebuh ti bejadi simbolik kelai berengkah bejalaika operasyen PKRC nya, kena Hari Tiga tu tadi.

Ngena awak tu mega Harden udah nyuaka pemeri barang ti diguna ungkup KRC tu iya nya panimbang, kereban kena meresa tikas peninggi darah, semperung ti besai enggau jemari plastik 5 ringkat.

Pemeri tu diterima Direktor Seiptal Sri Aman Dr Hazwani Mohd Yusop.

Ku Harden nambah, kelimpah nyendiaka palan ungkup pesakit COVID-19, iya minta ngagai semua rayat ngambika seruran ngasika garis lalau (SOP) taja pan udah lengkap dos vaksin nya.

Iya mega ngelalau ngambika sida ti ulih betuchuk vaksin datai ke Palan Betuchuk Vaksin nyema diasuh ari Opis Menteri Pengerai Malaysia (KKM) enggau Opis Pelilih Menua Sri Aman.

Sama bisi Pemesai Pelilih Menua Sri Aman Mohd Ashree Wee, Pemesai Pengerai Bagi Menua Sri Aman Dr Euphrasia Bari enggau bala ke bukai.

Advertisement