MIRI: Kaban Kunsil Nengeri (ADUN) ari parti penyakal patut nerima agih belanja ari perintah nengeri ti nyadika geran kena mantu rayat lebuh ti napi pemar diatu.
Ahli Dewan Negara Senator Alan Ling ngansak perintah nengeri ngambika ngerunding perambu tu kena ngerembaika bantu ngagai rayat ti begunaka nya.
“Perintah nengeri patut meri agih belanja RM250,000 ngagai Kaban Kunsil Nengeri (ADUN) penyakal baka ti diterima ADUN Gabungan Parti Sarawak (GPS) kena mantu rayat ti tekeruga.
“Mayuh rayat ti tekeruga ari sukut penatai pemisi ninting hari tauka ninting bulan kelebih agi dalam timpuh Atur Nagang Pemindah (PKP) tu lalu sida endang begunaka bantu,” ku Ling ti mega Sekretari Parti Tindakan Demokratik (DAP) Sarawak.
Beserimbai enggau nya, DAP Miri udah ngaghka 35 bakul pemakai ngagai peranak genturung pendiau Tudan Desaras dalam pengawa ngurangka tating penusah belanja dapur sida lebuh ti napi pemar diatu.
“Taja kami ngembuan penatai pemisi ti enda mayuh, tang kami bebendar enggau naka ulih mantu sereta nyendiaka bakul pemakai ngagai peranak di genturung pendiau Tudan Desaras ti begunaka nya,” ku Ling.
Sida nerima berau, telu, minyak nyumai, kupi, mi enggau pemakai ‘nasi ayam’ sereta tisu, sengkabung idung enggau nyawa sereta ‘sanitizer’ jari.
“Aku ngarapka pemeri tu ulih ngelempungka tating penusah ti ditapi lalu ngarapka sida ngenang sereta nerima bantu tu taja kami ngembuan penatai pemisi ti enda mayuh,” ku Ling nambah.
Iya beterima kasih ngagai raban ti nyukung ke udah mantu ngemujurka aktiviti tu.
Pemeri bantu ari sukut agih belanja ulih digaga nengah akaun Hong Leong Bank DAP Piasau iya nya 255-000-15930.
Sama bisi iya nya Ketuai Raban Nembiak DAP Sarawak Peter Hee, Chairman DAP Long Lama Marcus Hugo enggau Pemantu Khas Lawrence Low.