Anda di sini

Vaksin COVID-19 tetap ngasi enda ngira nama pan bansa nya: Dr Chung

Advertisement
 Indu misi nyendiaka vaksin maya PICK renggat keterubah ungkup raban terabai menua di Dewan Dri Kenyalang UPMKB sebedau tu. — Gambar arkib UB
BETUCHUK: Indu misi nyendiaka vaksin maya PICK renggat keterubah ungkup raban terabai menua di Dewan Dri Kenyalang UPMKB sebedau tu. — Gambar arkib UB

BINTULU: Vaksin COVID-19 ti diberi ngagai penerima dalam Program Imunisasi COVID-19 Menua (PICK) ngembuan guna ti sama iya nya kena nggenegapka sistem imun tubuh ari kena rampit igi penyakit COVID-19.

Pemesai Opis Pengerai Bagi Menua Bintulu Dr Melvin Chung madah, sekalika vaksin Sinovac tauka Pfizer BioNTech, kededua nya ngembuan tuju ti sama.

“Nyema penerima deka milih bansa vaksin ti dikedeka, sida ulih nginsil vaksin ti diberi nengah aplikasyen MySejahtera lalu deka diatur enggau atur semaya baru,” ku iya lebuh ti dipinta meri jaku timbal bekaul penerima ti deka milih bansa vaksin.

Dr Chung ti ditemu maya datai matau ke Palan Meri Vaksin (PPV) di restoran Dinner World, Bintulu Sentral ditu, kemari.

Ku iya madah, dalam MySejahtera bisi infografik ti ngayanka chara nukar atur asemaya kena betuchuk vaksin COVID-19.

Pia mega, ku iya, nadai penanggul abis stok vaksin COVID-19 tauka vaksin ti enda chukup tang penerima ulih datai ke PPV nitihka maya ti udah ditetapka dalam atur semaya betuchuk nya.

“Kitai ngarapka sida ti nerima tuchuk vaksin COVID-19 datai ke PPV nitihka maya ti udah ditetapka, enda ibuh datai kelalu tumu sereta anang irau enggau pekara nya laban vaksin tu udah disediaka,” ku iya nambah.

Ku iya nandu, penatai penerima vaksin ti kelalu mayuh lalu enda nitihka jam atur semaya ti udah ditetapka ulih ngasuh PPV tu dedat lalu enda ulih tejaga.

Ku iya, jam ti udah ditetapka tu diatur laban sida enggaika bisi nyadi pengelekai igi penyakit COVID-19 tu maya penerima betuchuk vaksin di PPV.

Advertisement