KUCHING: Pedagang mit dilalau terus ngasika timpuh Atur Nagang Pemindah (PKP) ti dilanjar ke udah ditetapka perintah dalam pengawa nagang pengelekai COVID-19.
Presiden Gerempung Pedagang enggau Pedaja Sarawak (PPPS) Mohd Ariffin Abdullah madah, raban sida mega sama ngelalau ngagai semua kaban gerempung ngambika seruran ngasika prosedur operasyen standard (SOP) ti udah ditetapka.
“Endang kitai nemu PKP (dilanjarka) tu deka ngeruga sektor ekonomi sereta penatai pemisi rayat kelebih agi raban pedagang sereta pedaja, tang kitai nadai pilih laban tu aja mih chara kena nurunka kes COVID-19.
“Kitai patut nerima pemutus Komiti Mutarka Penusah Ngenyit Nengeri Sarawak (JPBNS) lalu mesti ngasika atur ti udah dipansutka ungkup pengelikun semua raban,” ku iya madah ngagai Utusan Borneo kemari.
Iya madah munyi nya lebuh ti meri jaku timbal bekaul pemutus perintah Sarawak ngelanjarka PKP ungkup timpuh dua minggu agi sama enggau pemutus ti digaga di Semenanjung Malaysia.
Mohd Ariffin madah, iya empu chukup setuju enggau timpuh PKP ti dilanjarka ba selampur Malaysia.
Baka ke udah diripotka ku iya, kes ninting hari COVID-19 di menua tu agi tinggi.
“Berindik ari nya, rayat kelebih agi raban pedagang dipinta ngambika terus besabar.
“Teruska diau di rumah lalu semina pansut nyema bisi pekara ti berat aja,” ku iya.