Anda di sini

10 perau panjai dikena ngagihka bantu pemakai di kandang menua pesisir Moi enggau Machan

Advertisement
 Pengawa ngagihka bantu pemakai di kandang menua pesisir Machan.
NGAGIHKA BANTU: Pengawa ngagihka bantu pemakai di kandang menua pesisir Machan.

KANOWIT: Bisi 10 perau panjai udah dikena ngagihka bantu pemakai ngagai penerima di kandang menua pesisir Poi enggau Machan.

Kaban Kunsil Nengeri (ADUN) Machan Allan Siden Gramong madahka sida enggai enda pan ngena perau panjai kena datai ke dua kandang menua nya laban semina ulih dilawa nengah sungai.

“Berindik ari nadai jalai darat ke kandang menua tu, semina siti aja chara kami iya nya ngena perau panjai.

“Kami nyuwa lima perau panjai kena ngelawa tetiap kandang menua tu ungkup tuju ngagihka bantu pemakai kenyau ari 7 Jun.

“Kami merambu semua peranak ba dua kandang menua pesisir tu nerima bantu pemakai datai ba 14 Jun tu,” ku iya.

Ku Allan madah, nya ukai pengawa ti nyamai nganjung pemakai ngagai penerima di kandang menua nya laban sida mega bepanggai ngagai gaya mua hari enggau tikas penalam ai ba sekeda sungai ti ulih nyadi pabu.

“Chukup benasit laban tikas ai sungai chukup penalam kenyau ari berapa hari ti udah. Tu ngemuntangka pengawa kitai lalu semina begunaka urung tiga jam kena datai ba kededua kandang menua nya,” ku iya nerang.

Kelimpah ari nya, raban pengereja pengawa patut ngaga mayuh agi pengawa nganjung laban tetiap perau panjai semina ulih mai 20 set bakul pemakai.

“Kami semina ulih ngena paru mit ke nyamai deka dibai nitihka arus ai pasang,” ku iya.

Bisi 4,800 penerima bantu pemakai di kandang menua Machan.

Nitih ku Allan setengah ari sida udah nerima bantu pemakai kemari.

Perintah nengeri udah ngagihka RM250,000 ungkup tetiap 82 kandang menua meli bantu pemakai sida ti tekeruga laban Atur Nagang Pemindah (PKP) 3.0.

Tetiap bakul pemakai nya bisi munyai nyumai, tepung, mi, siti pemakai dalam tin, biskut, teh enggau berau ti sepenyampau RM70.

Advertisement