Anda di sini

Vaksin udah berengkah dianjung ke menua pesisir Miri

Advertisement
 Lee (empat kanan) begulai enggau sida ti bekaul sama ngemujurka misyen nganjung bekal vaksin sereta bantu bakul pemakai ke menua pesisir Miri.
MISYEN: Lee (empat kanan) begulai enggau sida ti bekaul sama ngemujurka misyen nganjung bekal vaksin sereta bantu bakul pemakai ke menua pesisir Miri.

MIRI: Bisi 1,760 dos bekal vaksin Sinovac udah dianjung ke empat klinik pengerai di menua pesisir Miri nengah penerebai pengasih ari Miri ngena helikopter ti diempu Opis Bomba enggau Penyelamat Malaysia (JPBM) pagi kemari.

Menteir ti Megai Tanggungpengawa Komiti Mutarka Penusah Ngenyit Dagi Menua (JPBB) Miri Datuk Lee Kim Shin madah, empat klinik pengerai (KK) tu iya nya KK Bario, KK Mulu, KK Long San enggau KK Long Bedian.

“Kitai deka nganjung chara bererenggat lalu sehari tu (kemari) iya nya penerebai keterubah ungkup empat KK nya ti nitihka semaya ke disediaka Opis Pengerai Bagi Menua Miri (PKBM) begulai enggau bomba.

“Dua pengereja pengawa pengerai ari PKBM mega sama dianjung,” ku Lee madah nengah siti penerang media.

Nitih ku Lee, tetiap KK di menua pesisir ke nerima bekal vaksin tu bisi pemesai perubat, bekal elekterik ti manah sereta peti ais bansa ‘Top Loading’ kena besimpanka vaksin tu.

“Kemari (Hari Tiga), Bagi Menua Miri udah nerima vaksin bansa Sinovac ti dibai ari Kuala Lumpur lalu pengawa ngagihka vaksin udah digaga ke palan meri vaksin di Bagi Menua Miri ngena jalai darat disempulang polis Miri enggau Marudi,” ku iya.

Ku Lee ti mega Menteri Perengka Pengangkut nerang, aktiviti meri vaksin di kandang menua pesisir Miri deka berengkah dipejalaika sehari tu, 12 Jun.

“Kaban Kunsil Nengeri (ADUN) enggau pemesai pelilih menua sida udah dipadahka kena mantu peranak genturung pendiau datai betuchuk vaksin nitihka atur semaya ti udah ditetapka.

“Ungkup sida ti bedau berejista ngulihka vaksin, sida ulih ngerejista ba palan meri vaksin nya, laban vaksin pengawa ngerejista ulih digaga chara manual lalu enda bepanggai penuh ngagai aplikasyen MySejahtera.

“Kerejasama rat semua raban endang diguna kena nentuka aktiviti meri vaksin tu dipejalaika enggau manah,” ku Lee nambah.

Kelimpah ari bekal vaksin, pengawa nganjung bantu bakul pemakai enggau pemerat 731 kilogram udah mujur dianjung ke Ba’Lai.

Penerebai bilun nya udah dibai Kapten Faridullahamin Mohd Noh lalu dibantu Robert James sereta Saravanan ti berengkah bejalai ari Pengkalan Operasyen Langit JBPM Miri pukul 10:15 pagi lalu mujur datai pukul 2 lemai.

Pengawa nganjung vaksin tu mega disereta Ketuai Opis Bomba enggau Penyelamat Malaysia Zon 6 Miri Penguasa Kanan Bomba I Law Poh Kiong.

Ungkup penerebai bilun ti nangkanka tu, laluh bantu bakul pemakai pemerat 2,703 kg deka dianjung ke Long Sait enggau Pa’Tik sehari tu laban gaya mua hari ti enda manah lemai kemari.

Sama bisi datai ngemataka penerabai pengasih nya Pemangku Residen Bagi Menua Miri ti mega Chairman JPBB Miri Abdul Aziz Mohd Yusuf.

Pemesai Opis Pengereai Bagi Menua Miri Dr P. Raviwharmman Packierisamy enggau Ketuai Sektor Program Pemansang Pengerai Ruang Bilik, Opis Pengerai Bagi Menua Miri Dr Noor Izni Mohamed Shapie.

Advertisement