BINTULU: Palan Meri Vaksin (PPV) Industri di kilang ngelebur aluminium Press Metal Bintulu Sdn Bhd nyangka deka dibuka kena mantu ngelengkaska Program Imunisasi COVID-19 Menua (PICK) di bagi menua Bintulu.
Pemesai Opis Pengerai Bagi Menua Bintulu Dr Melvin Chung madah, PPV Industri nya khas ungkup pekereja sektor industri ti bejalaika operasyen di kandang endur Taman Perindustrian Samalaju.
“Pengawa betuchuk vaksin tu nyuluk bisi 6,000 pekereja kompeni Press Metal Bintulu Sdn Bhd lalu tu iya nya inisiatif ti diayanka kompeni nya ti deka sama nyulung PICK Bagi Menua Bintulu,” ku iya lebuh ti ngelawa PPV ba Palan Industri Taman Industri Samalaju kemari.
Ku iya madah, raban sida benung nganti pemutus Raban Pengereja Pengawa Imunisasi COVID-19 (CITF) Sarawak dalam pengawa muka PPV Industri lalu udah ngelangkar ngagai CITF Sarawak ngambika beoprasyen dalam minggu tu.
“Kitai agi nganti pemutus CITF Sarawak dalam nentuka haribulan operasyen PPV Industri tu,” ku iya seraya nambah operasyen PPV Industri tu deka dipejalaika semua nya ari Protect Health Corporation Sdn Bhd enggau sida ti gawa iya nya panel lutur ari kompeni tu empu.
Nitih ku iya, Opis Pengerai Bagi Menua Bintulu semina mantu matau ari sukut ripot sereta mutarka penanggul ti bekaul enggau vaksinasyen nyema sida diguna.
Kelimpah ari nya, ku iya, PPV baru ke bukai mega deka diaktifka di bagi menua Bintulu iya nya ba Dinner World Bintulu enggau PPV ke udah bisi diatu baka PPV Dewan Sri Kenyalang UPMKB, PPV Dewan Sukan Tatau sereta PPV Balai Raya Sebauh.
Program ngelawa tu mega sama disereta Kaan Parlimen (MP) Bintulu Datuk Seri Tiong King Sing, Sapit Direktor Sepital Bintulu Dr Sivashunmugam Sangaran enggau Menijer Orang Gawa Press Metal Low Kwong Fei.