SIBU: Hari hujan enda nekul pengawa ngagihka Bantu Bekal Pemakai Sarawakku Sayang di sitak Kunsil Nengeri (DUN) Bawang Assan kemari.
Bantu ari perintah Gabungan Parti Sarawak (GPS) nya disuaka Senator Robert Lau Hui Yew ngagai penerima di kandang menua Sungai Tebelian, Tanjung Bekakap, Sungai Apong enggau Sungai Melanggan.
Pengawa ngagihka bantu maya hari ketiga tu udah ngaul bantu pemakai baka berau, mi, gula, tepung, biskut, pemakai dalam tin, minyak enggau kupi.
Bantu tu kena ngelempungka tating penusah peranak rumah panjai ketegal pandemik COVID-19 sereta mega pentin Atur Nagang Pemindah (PKP) 3.0.
Kemari, bantu ti sama udah diagihka ngagai 13 buah rumah panjai di Bawang Assan sereta semanjai Jalai Tanjung Manis enggau Sungai Bidut.