SIBU: Bagi Menua Kapit deka nerima 16,680 dos vaksin COVID-19 ninting minggu dalam timpuh ke semak tu.
Kepala Menteri Datuk Patinggi Abang Johari Tun Openg madah, dos nya deka dianjung ngagai Palan Nuchuk Vaksin (PPV) ke alai pelilih Kapit deka nerima 8,160 dos vaksin, Song (3,680)lalu Asap, Belaga (4,840).
"Diatu dianggarka10 peratus tauka 8,662 iku ke ngerejista diri nengah aplikasyen Mysejahtera udah dituchuk vaksin.
"Kelimpah ari numbuhka PPV, Komiti Mutarka Penusah Ngenyit Bagi Menua Kapit (JPBBK) mega bisi numbuhka Unit Mindah Kin Kitu PPV sekalika nengah darat, sungai enggau langit,bepanggai ba endur enggau gaya hari.
"Pengawa JPBBK enggau Opis Menteri Pengerai Malaysia (KKM) tu mega dibantu Angkatan Tentera Malaysia," ku iya lebuh ke bejaku ba aum media ditu, kemari.
Dulu ari nya, iya bisi nemuai ke Kapit ngulu sesi Meri Penerang Khas Pelin Kereja Program Imunisasyen COVID-19 Bagi Menua Kapit enggau Penyikap JPBBK mutarka pandemik nya.
Lebuh ke nemuai nya,iya mega lalu bejadi Pengerami Nyuaka Bantu Pemakai Sarawakku Sayang di Dataran Kapit, kelimpah nyadung bantu pemakai ngagai raban pengereja pengawa terabai menua ti ngaga empang jalai (SJR) Kapit-Song.
Sama bisi datai, ketiga-tiga sapit kepala menteri iya nya Datuk Amar Douglas Uggah Embas, Tan Sri James Jemut Masing enggau Datuk Amar Awang Tengah Ali Hassan enggau Menteri Pengelantang Pendiau Komuniti, Orang Indu, Ruang Bilik enggau Pemansang Anak Mit (KWKPK), Dato Sri Fatimah Abdullah.
Ku Abang Johari, bisi16 raban Unit Mindah Kin Kitu nuchuk vaksin ditumbuhka di Kapit, (20) di Bukit Mabong, (2) di Song lalu dua agi di Belaga.
Ku iya, enti pelin kereja nya mujur, dianggarka16,000 nyentuk 17,000 iku di bagi menua Kapit deka dituchuk vaksin ninting minggu lalu proses nya dipelaba ulih ditembuka nyerumba bulan Ogos.
Kelimpah ari nya ku iya, 32 buah sekula di bagi menua nya deka dibuka nyadi PPV.
Dalam aum media ke sama, Abang Johari mega ngemendarka agih belanja RM400,000 dikena ngemanahka untuk rumah bangkai Sepital Kapit.
Kelimpah ari nya, Abang Johari mega madahka RM4.5 juta udah diungkupka kena ngangkatmanah Unit Intu Siru (ICU) Sepital Kapit ke benung dalam proses digaga diatu.