MIRI: Bisi 21,920 dos vaksin bansa Sinovac ti diterebaika khas ngena bilun Malaysia Airlines Berhad (MAB) ari Kuala Lumpur udah datai ba Padang Bilun Miri pukul 11.15 pagi kemari.
Penatai vaksin ba padang bilun nya disambut Menteri Perengka Pengangkut ke mega Menteri ti megai Tanggungpengawa ba Komiti Mutarka Penusah Ngenyit Bagi Menua (JPBB) Miri, Datuk Lee Kim Shin ke lalu nyadi Menteri Muda Dagang Temuai enggau Seni, Datuk Sebastian Ting.
Lee nengah penerang media m adah, stok vaksin Sinovac nya endang deka dikena ba bagi menua Miri lalu mayuh agi vaksin nya deka dianjung sereta dipelabaka datai ninting minggu.
“Pengawa nganjung vaksin Sinovac tu endang siti ari chara kena ngenyampatka proses vaksinasyen nyengkaum kena nyapai 'imunisasi kelompok' baka ti dipadahka Kepala Menteri, Datuk Patinggi Abang Johari Tun Openg bedau lama udah.
“Udah tu dipelabaka mayuh agi stok vaksin dianjung kitu ninting minggu,” jelasnya.
Pengudah bilun nya sangkai, staf MASKargo lalu munggah sereta nepu vaksin ke dalam perengka pengangkut ari Syarikat Pharmaniaga Logistics Sdn Bhd disempulang polis nuju palan naruh nya ti udah ditetapka.
Sama bisi maya nya Pemangku Residen Bagi Menua Miri ke mega Chairman JPBB Miri Abdul Aziz Mohd Yusuf, Pemesai Pengerai Bagi Menua Miri Dr P. Raviwharmman Packierisamy, Direktor Sepital Miri Dr Jack Wong enggau Pemesai Farmasi Bagi Menua Miri, Eileen Yii.