SIBU: Kongres Gerempung Pekereja Dalam Kereja Perintah (CUEPACS) Sarawak ngarapka perintah berunding jampat agi nuchuk vaksin COVID-19 ngagai semua pengereja pengawa perintah ti nyadi tulang belakang bejalaika pengawa di menua tu.
Chairman CUEPACS Sarawak Omar Bahrein Unin madah, pengawa nuchuk vaksin ngagai semua pengereja pengawa perintah beguna amat ngambika sida tau bejalaika pengawa ngemujurka agenda mulaika pemanah ekonomi rayat enggau menua.
Ku iya, langgur penemu nya ukai deka ngenadaika raban ke ditagit ke bukai ti patut dituchuk vaksin COVID-19 tumu agi.
“Nengah pengawa tumu nuchuk vaksin nya, tentu deka ngurangka penanggul pengereja pengawa perintah bejalaika pengawa sida baka selama ba palan kereja, lalu sida mega tau enda ibuh agi bekereja ari rumah.
“Kelimpah arui nya, ulih mantu ngurangka risiko dirampit ba pengereja pengawa perintah laban tebal agi sida gawa nengah chara betunga mua,” ku iya nengah sebengkah penerang ditu, kemari.
Ku Omar, CUEPACS Sarawak mega mnyukung meri vaksin dulu agi ngagai raban pengajar enggau staf sekula.
Ku Omar, raban pengajar deka mudah agi kena rampit maya sida ba sekula, tambah mega sesi besekula betunga mua dipelabaka deka berengkah tengah bulan Julai tu.
Ku iya, CUEPACS mega ngarapka semua aset ejensi perintah ke bukai mega mesti ditusun sereta diasuh gawa mantu operasyen nagang pengelekai COVID-19.
Tu nyengkaum perengkaguna logistik baka perengka pengangkut opis, mija, kerusi enggau langkau ngambika diberi ngagai Palan Kuarantin enggau Berubat COVID-19 Berisiko Baruh (PKRC), Palan Nuchuk Vaksin (PPV), Bilik Operasyen COVID-19 Opis Pengerai Pelilih Menua, klinik pengerai enggau Palan Info COVID-19 (CAC) ngambika gawa ba fasiliti nya ti ulih dikemanahka agi nya.
Ku iya, pekara nya mesti diputuska jampat kena netuka tetiap pengawa ke dikereja kena nagang pengelekai COVID-19 ulih dikemujurka.