Anda di sini

KM, Presiden komponen GPS dikangau betemu enggau Agong kena 14 Jun

Advertisement

KUCHING: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah udah ngangauka bala presiden komponen parti Gabungan Parti Sarawak (GPS) betemu enggau iya kena Hari Satu tu ila (14 Jun).

Opis Kepala Menteri nengah penerang berita kemari, madahka iya bisi nerima kangau ari Istana Negara ti ngangauka Kepala Menteri Datuk Patinggi Abang Johari Tun Openg betemu enggau Yang di-Pertuan Agong begulai enggau bala ketuai parti politik.

“ Opis Kepala Menteri Sarawak udah nerima kangau ari Istana Negara sehari tu ( kemari) ti madahka Yang di-Pertuan Agong udah ngangauka bala presiden komponen parti GPS nengah aum video ari opis tu kena 14 Jun tu, pukul 11 pagi,” ku iya.

Dulu ari nya, Menteri Besai Tan Sri Muhyiddin datai ba Istana Negara kemari, betemu enggau Yang di-Pertuan Agong

Entukar rasmi Muhyiddin dipeda tama nengah pintu penama besai Istana Negara pukul 7.50 pagi.

Baka selama, Muhyiddin ke mega Menteri deka nyembah  Seri Paduka sebedau aum Kabinet diatur kena Hari Tiga, kena madahka sentang gaya atur ngiring menua.

Dipadahka mega, Yang di-Pertuan Agong deka nerima penatai bala ketuai parti politik menua, nyengkaum Muhyiddin ke mega Presiden Bersatu, enggau chara kediri- kediri berengkah ari kemari.

Kena Hari Satu, sebuah portal madahka Yang di-Pertuan Agong dipelaba deka betemu enggau bala ketuai parti politik besai di menua tu berengkah ari 9 nyentuk 11 Jun 2021.

Nitihka sekeda pemadah,Yang di-Pertuan Agong dipelaba betemu enggau Presiden Bersatu ke mega Menteri Besai, Tan Sri Muhyiddin Yassin ba sesi keterubah, ditangkanka parti ke bukai ti bisi pengari dalam Dewan Rakyat.

Taja pia, penerang nya madahka pengawa betemu nya semina kena ngulihka buah penemu lalu nadai perambu ngubah ngagai perintah emerjensi ba awak ke semak tu.  

Seri Paduka mega dipadahka deka ngena awak nya mendingka isu ke nyadi diatu nyengkaum bekaul proklamasi emerjensi.

Advertisement