KUCHING: Dua buah rumah panjai di Sarikei dikompaun RM4,000 ketegal bejalaika pengawa miring beserimbai enggau Hari Gawai kena 31 Mei tu tadi.
Opis Pengerai pelilih menua Sarikei ngeluarka kompaun nya ngagai Rumah Lingga, Sungai Selangan enggau Rumah Thomas Settian, Skim B, Bintangor.
Komiti Mutarka Penusah Ngenyit Nengeri Sarawak (JPBNS) nengah jaku penerang kemari madah, kededua buah rumah panjai tu dikompaun ketegal enda nitihka Prosedur Opearsi Standard (SOP) ke udah ditetapka.
Kelimpah ari nya,JPBNS mega udah ngaga pemutus senentang PKPD diteritka di Tatau di Bintulu, iya nya Kuarters Pengereja Pengawa Malaysia WCT Construction Sdn Bhd berengkah ari 5 ngagai 18 Jun, enggau Rh. Bair Anak Mam, KM28 Jalai Samarakan, Tatau (6 ngagai 19 Jun).
PKPD mega udah dipejalaika ba dua buah rumah panjai di Pakan berengkah ari 8 Jun ngagai 24 Jun, iya nya Rh. Ranggie, Nanga Bekakap, Rh. Ubil, Babai enggau Rh. Ko, Genega, Pakan.
Kelimpah ari nya mega, PKPD udah dipejalaikabai Rh. Sigi, Sg Sentebu Sare, Sarikei (kemari ngagai 25 Jun).
Di Kuching, PKPD mega dipejalaika ba Kampung Sinar Budi Baru, Kuching berengkah ari sehari tu (10 Jun) ngagai 23 Jun 2021.
PKPD di pelilih menua Sri Aman dilanjarka baru berengkah ari 8 Jun ngagai 21 Jun, 2021 ba Rh. Kelly Kumpang Langgir, Engkilili enggau di Rh. Banying Kumpang Langgir.
Ku JPBNS baru, kemari Pelilih menua Pusa udah bebali chura zon nyadi Kuning ari (oren) pengudah pelilih menua nya ngerikod 20 kes positif Covid-19 dalam kandang 14 hari.
Penyampau pelilih menua ke bebali ngagai Kuning bisi semilan pelilih ( oren) ari Kuning pengudah kededua sitak tu ngerikod 22 enggau 21 kes pengerekai kes Covid-19 dalam kandang 14 hari ke udah.
Naka ke diatu, penyampau pelilih menua ke bechura oren bisi tiga alu, 28 pelilih menua ke mengkang Mirah lalu nadai pelilih menua Gadung,” ku JPBNS.
Kelimpah ari nya, JPBNS madahka Program Imunisasyen Covid-19 di Sarawak udah berengkah dipejalaika kena 26 Februari 2021.
Kena 8 Jun tu tadi, urung 5,234 mensia mayuh udah dituchuk vaksin dos keterubah, lalu 6,872 iku udah betuchuk vaksin dos kedua.
Nitihka semua penyampau mensia mayuh ke udah betuchuk naka 8 Jun, 254,743 iku udah nerima Vaksin Covid-19 dos keterubah (8.9 peratus ari mensia mayuh di Sarawak), lalu naka ke diatu, 125,650 mensia mayuh udah betuchuk dos kedua (4.3 peratus ari semua penyampau mensia ke diau di nengeri tu).