TATAU: Bisi 7, 577 Ketuai Ruang Bilik (KIR) dalam sitak Kunsil Nengeri (DUN) N60 Kakus nerima Bantu Bekal Pemakai Sarawakku Sayang ti berengkjah disadung kenyau ari Hari Satu nyentuk Hari Lima.
Ku Menteri Muda ba Opis Kepala Menteri (Undang-Undang enggau Adat Bumiputera) Sarawak Datuk John Sikie Tayai kena Hari Satu tu tadi, Palan Servis DUN N60 Kakus nganjung bantu nya ngagai kandang menua Takan.
“Sehari tu, raban nya nganjung bantu tu ke disempulang aku empu enggau Penghulu Micheal Agul sereta ketuai raban bansa ke bukai, deka majak nyadung bantu tu ngagai palan nuruka bantu di Rumah Dilang di Ulu Anap enggau Rumah Salleh di Nanga Tau ke mungkur 14 rumah panjai,” ku iya nengah penerang berita ditu, kemari.
Iya ke mega ADUN Kakus madah, pengawa nyadung bantu tu deka dipejalaika nengah chara berenggat pengelama lima hari tu laban rumah panjai tu enda sama alai sereta jauh ari pangan diri.
Nya alai ku iya, iya minta peranak rumah panjai nganti dulu bantu ke deka diberi nya ketegal bisi penanggul ba stok barang enggau suntuk tubuh staf ba Palan Servis DUN N60.
Berebak enggau nya ku Sikie, Klinik Pengerai (KK) Nanga Tau enggau KK Sangan deka digaga nyadi palan Program Imunisasyen COVID-19 Menua.
Ku Sikie, nya kena ngemudahka pengawa nuchuk vaksin ngagai peranak di menua pesisir di kedua-dua kandang menua nya.
“Mensia mayuh diTatau dinlalau ngambika seruan meresa status MySejahtera sereta ngulihka rintai nama penerima vaksin ti dikeluarka opis ti megai tanggungpengawa nya,” ku iya.