SIBU: Parti Sarawak Bersatu (PSB) sebuah parti ti ngatika diri lalu enda nyukung Gabungan Parti Sarawak (GPS) tauka barang bagi gempung parti politik ke bukai.
Presiden PSB Dato Sri Wong Soon Koh madah, PSB nadai kala ngembuan juluk ati deka begempung tauka nyemilik GPS, tang nguji deka nyilih GPS merintah Sarawak dudi ila.
Ku iya, prinsip parti nyata amat iya nya enda enggai nunduk tauka diperintah sesapa kaban politik tauka parti ari Semenanjung Malaysia.
“PSB ungkup Sarawak ditumbuhka rayat Sarawak ti pupu bansa ngambika beserakup ari baruh payung ke sama ketegal deka mai ubah baru sereta manah agi ngagai Sarawak.
“Kelimpah ari nya, PSB seruran bemalinka tuju asal ditumbuhka iya nya deka mai ubah ngagai rayat Sarawak pengudah 58 taun ari baruh pegai gempung perintah entara Barisan Nasional (BN)/GPS ti semina ngemansangka mimit aja, taja pan Sarawak siti ari bakih kunsi ti pemadu kaya di Malaysia,” ku iya nengah diti penerang kemari.
Iya bejaku munyi nya ngenang siti video lama ti dipansutka baru lalu dikerembai ba media sosial, ti mandangka sida baka ke nyukung Kepala Menteri, Datuk Patinggi Abang Johari Tun Openg enggau GPS.
Ku Wong, video nya sengaja dikerembaika kena ngelemika iya enggau PSB ba media sosial ti nyadi ‘pro-GPS.’
Ku iya, PSB enda nunduk tang deka chakah agi gawa numbangka GPS ti bekerejasama enggau UMNO sereta PAS numbuhka Perikatan Nasional (PN) ke mega perintah besai ‘pintu belakang’ ti enda setipak enggau semengat ‘Fairland Sarawak.’
Taja pia, Wong madahka PSB tetap tebuka bekerejasama enggau barang bagi parti ti ngembuan juluk ke sama maya Pengawa Bepilih Raya Nengeri ke deka datai.
Ku iya, tuju kerejasama tu iya nya kena nyapai juluk begulai nyilih GPS nyadi perintah Sarawak.
“Kami (PSB) enda tekeruga ari juluk parti sereta deka majak chakah agi gawa begulai enggau rayat Sarawak kena nyapai objektif begulai nya,” ku iya nyemetak.
Ku iya, PSB udah sedia endar ba juluk nya kena muka jalai mai ubah ngagai Sarawak.
“Aku ati ti baruh minta rayat Sarawak ti ngembuan juluk ke sebaka enggau kami ngambika bediri teguh begulai enggau kami nempa jalai baru dalam sejarah Sarawak ari baruh ‘Sarawak Baru’,” ku iya