SARIKEI: Kaban Kunsil Nengeri Repok, Dato Sri Huang Tiong Sii nyemetak madahka juluk ati iya ke nyadi pengari rayat ba sitak nya, endang seruran fokus ngagai pemansang ekonomi,negapka sosial mensia mayuh, pelajar ungkup rebak biak enggau nyerakupka komuniti ari baruh siti perugan.
Ku iya, pengawa nuju juluk nya majak ditegapka nengah bejalaika mayuh bengkah pelin enggau chara ti meri pemaik ngagai mensia mayuh.
“Kami pechaya juluk tu ulih dijapai nyentuk ke tikas pemadu maksimum enti semua ulih bekerejasama sereta nyingkang nyadi siti tim.
“Diatu Sarikei udah ngerembai maju ari mayuh bengkah aspek. Nya alai, kami ngarapka momentum tu ulih ditanka sereta diangkatka belama,” ku iya.
Iya bejaku munyi nya maya baum ngena aplikasyen enggau bala kaban komiti SUPP Pampang Sarikei, ensana.
Batang tuju aum iya nya berandau sereta besilih penemu enggau bala kaban komiti bekaul isu ke diatu, penanggul rayat enggau aktiviti pemansang dia.
Baya ke baum nya mega, Huang muji kerejasama semua kaban SUPP Pampang Sarikei lalu iya meri besai terima kasih ngagai rayat ba sitak Repok ti semampai meri sukung ke penuh ngagai iya ngelama tu.
Ngena peluang nya mega, Huang minta semua kaban komiti SUPP Pampang Sarikei ngambika ngembuan ulah ngemaruhka diri maya mendiangka penanggul rayat.
“Kitai mesti ngemeranka polisi enggau ulah tebuka dalam semua pekara.
“Berebak enggau nya, kami mega minta semua rayat ngambika majak meri sukungan penuh ngagai perintah Gabungan Parti Sarawak (GPS) enggau iring Kepala Menteri, Datuk Patinggi Abang Johari Tun Openg ngambika pengawa ngangkatka ekonomi enggau tikas pengidup rayat Sarawak ulih ditampung belama,” ku iya nyemetak.