BINTULU: Raban nembiak patut sedia megai tanggungpengawa sereta sama enggau komuniti dalam nempa ulah ti ulih nyadi ketuai lalu begulai rat enggau komuniti dalam sama meri sukung enggau buah penemu ungkup pemaik komuniti.
“Raban nembiak kelebih agi di Sarawak mega patut sama ngenegapka diri enggau penemu sereta pengelandik ngambika ulih terus besemekih dalam betapi enggau ubah arus pemansang dunya pengudah abis pandemik COVID-19,” ku Menteri ba Opis Kepala Menteri (Integriti enggau Ombudsman) ti mega Kaban Kunsil Nengeri (ADUN) Jepak Datuk Talib Zulpilip.
Iya madah munyi nya dalam jaku tangkan iya beserimbai enggau Hari Raban Nembiak Menua 2021 ti berambai jaku ‘Dekad Ini, Dekad Kita’ kemari.
Dalam betapi enggau penguji tu ku iya, nya deka ulih nyadi pun ngagai bala nembiak nyikap diri enggau ulih besemekih dalam megai tanggungpengawa nyadi ketuai nengeri enggau menua jemah ila.
Iya mega sama ngarapka bala nembiak ulih terus nyulut nyadi nembiak ti ngembuan integriti, disiplin, ulih besemekih sereta nyadi reta ngagai menua.
Berindik ari nya, dalam gaya pengelekai igi penyakit sereta pengawa nagang pengelekai tu, Talib ngarapka raban nembiak enggau komuniti semua deka terus ngasika prosedur operasyen standard (SOP), nyaga diri, nyaga diri sebilik lalu sama begulai mutuska rentayan pengelekai COVID-19.