MIRI: Peranak Miri dipechaya besedia lalu nerima enggau manah Atur Nagang Pemindah (PKP) ti dipejalaika kena nagang pengelekai igi penyakit COVID-19 di bagi menua tu.
Ahli Dewan Negara Senator Alan Ling madahka penemu diri iya nya chara ti drastik patut dipejalaika berindik ari kes positif ti majak nambah ke ulih ngeruga pengelikun enggau nyawa peranak.
“Perintah patut pechayaka enggau PKP ungkup peranak Miri ngambika sida mega meri ti pemadu manah enggau diau ba rumah ungkup pengelikun semua,” ku Ling kemari.
Iya madahka dalam bulan tu aja, Miri udah bisi empat kali ba penuduk ti pemadu atas bisi kes positif ti mayuh di Sarawak.
Beserimbai enggau nya, iya minta Komiti Mutarka Penusah Ngenyit Bagi Menua Miri (JPBBM) ngambika ngelangkar chara ti efektif agi kena ngetuka rentayan igi penyakit tu.
“Aku minta Datuk Lee Kim Shin (Menteri Ti Megai Tanggungpengawa JPBBM) ngambika nyikap diri sereta nyeliahka nya, ukai semina ngelalau mensia mayuh dalam ngasika SOP,” ku iya.
Nyema PKP dipejalaika di Miri, ku iya, raban ti bekuasa patut nyendiaka bantu ngagai peranak kelebih agi ngagai raban ti kurang bepenatai pemisi.
Sekretari Pakatan Harapan (PH) enggau Parti Tindakan Demokratik (DAP) Sarawak nya mega nambah, PKP ti dipejalaika di selampur menua taun nyin kemari udah mujur nagang pengelekai igi penyakit nya.
Nitih ku iya, kes majak nyadi sepengudah raban ti bekuasa ngemendarka pengawa kuarantin di rumah kelebih agi ungkup sida ti pulai ke Sarawak, ke lalu nyadika nya peluang ngagai sekeda raban ngelanggar atur lalu udah ngujungka tu berampit ngagai mensia mayuh.
“Ba pun taun tu tadi, ketegal nendu sereta pengilap ngemendarka kuarantin di rumah ngagai sida ti tama ke Sarawak, nya alai lalu bisi mayuh kluster baka Kluster Pasai ti ngujungka gaya pandemik tu majak nyadi di Sarawak,” ku iya.
Dalam konteks Sarawak, Ling madahka kes berampit di selampur nengeri agi ba tikas ti ngirauka ati.
Nitih ku iya, Sarawak suah ba penuduk pemadu atas ti bisi penyampau kes positif di selampur menua dalam ripot ninting hari Opis Menteri Pengerai.
“Sarawak suah ba penuduk (entara ti) pemadu atas lalu ngira penyampau peranak di Sarawak ke enda tentu mayuh, tikas kena rampit COVID-19 endang pemadu tinggi lalu chukup ngirauka ati,” ku iya.
Gaya ti terus nyadi tu, ku iya, mega udah meri empas ti enda manah ngagai raban pedagang menua.
Berindik ari nya, ku Ling nerang, perintah nengeri terus meri bantu ngagai raban tu nyengkaum pengereja pengawa ti bepanggai ngagai gaji ninting hari.
Ungkup renggat menua, ku Ling madah, dipeda bedau mujur nyaga gaya pandemik tu enggau manah.
Kelimpah ari nya, program imunisasi selampur menua mega dipejalaika enggau lubah ti ngujungka mayuh rayat udah nadai ngembuan pengandal ati deka nyereta sereta ngerejista diri.