Anda di sini

Sediaka infrastruktur, kurikulum pelajar nitihka gaya ti benung nyadi diatu

Advertisement
ADAM
ADAM

KUCHING: Perintah kelebih agi Opis menteri Pelajar Malaysia (KPM) dikearap ulih terus nyendiaka infrastruktur sereta kurikulum pelajar ti ulih nangkup pemansang kemaya hari di menua tu.

Presiden Gempung Gerempung Pengajar Sarawak (STU) Adam Prakash Abdullah madah, kurikulum mega patut ngemeratka gaya COVID-19 ti nyadi diatu, pengawa belajar ba rumah, kereban enggau meresa sereta prosedur ngambika sistem nyendiaka pelajar praktikal ti meri reti ngagai nembiak sekula.

“STU ngarapka KPM mega ulih terus ngangkatka gaya endur gawa sereta palan endur diau ungkup pengajar, nyendiaka servis nyaga rama ti manah agi sereta ngenukuka bantu sukung pengajar di selampur menua.

“STU endang ngenang basa nyema perintah nengeri ulih ngangkatka penyampau penerima ‘Anugerah Perkhidmatan’ (Long Service) nyadika tanda basa ngagai pengeransing gawa bala pengajar tu udah meri servis di nengeri tu,” ku iya.

Iya madah munyi nya ngagai Utusan Borneo, kemari bekaul juluk STU beserimbai enggau pengerami Hari Pengajar 2021 ti deka diintu kena 16 Mei ti berambai jaku ‘Berguru Demi Ilmu, Bina Generasi Baharu’.

Ku Adam madah, enda disangkal agi iya nya pengajar bejalaika tanggungpengawa ti berat dalam nempa menua enggau ngajar sereta ngiri penemu, ngelatih pengelandik dalam pengidup sereta profesional.

“Pengawa pengajar di sekula majak minta sereta begunaka pengajar ti kreatif enggau inivatif dalam nentuka pengawa ngajar sereta belajar meri empas ti manah dalam kelas.

“Pengajar dikearap ulih terus ngangkatka tikas pemanah gawa diri sida enggau profesional nyentukka ulih ngemansangka nembiak enggau mungkur semua pekara baka ti udah ditukuka dalam Polisi Pelajar Menua kitai,” ku iya.

Ku iya madah enggau nya pengajar patut terus ngangkatka diri nyadi pengajar ti ngembuan penemu ke terus relevan enggau pengerambai pelajar global.

Kelimpah ari nya, ku Adam madah, STU mega ngarapka pengawa ngangkatmanah begunan sereta perengkaguna sekula primari di nengeri tu dalam rintai keterubah ngambika nembiak sekula di menua pesisir ulih ngasaika pengelantang belajar dalam rampa belajar ti kondusif.

“Kami ngarapka penanggul ulih akses internet tu ulih diputarka enggau lengkas laban anak sereta pengajar kitai enda ulih besemekih lalu nyapai tikas global nyema terus bisi pengurang ari sukut pelajar pemun tu.

“Berindik ari nya, STU madahka Selamat Hari Pengajar ngagai semua pengajar lalu ngarapka semua pengajar terus meri servis sida enggau penuh komited dalam nama pan gaya ti nyadi. Nembiak sekula deka terus ngingatka pengeransing sereta ngenang pengawa ke udah diberika pengajar sida,” ku iya.

Advertisement