KUCHING: Perintah Sarawak nengah Rumah Sarawak di Kuala Lumpur enggau Sarawak Volunteers udah mantu mai pulai 952 iku nembiak matrikulasi ti belajar ba Semenanjung enggau Labuan ke nengeri tu.
Pengawa nganjung pulai bala nembiak tu diatur bererenggat entara 11 Mei nyentukka 14 Mei 2021 lalu raban kepenudi 35 iku nembiak di Semenanjung udah dianjung pulai ngena penerebai bilun MH2742 ari Padang Bilun Antarabansa Kuala Lumpur (KLIA) ke Bintulu kemari.
Sida tu iya nya ari 14 iku nembiak matrikulasi di Selangor, Nengeri Sembilan (12), Melaka (3), Perak (3), Johor (2) enggau Pulau Pinang (1).
Ungkup nembiak bansa Iban, Louisa Geranting, 19, pemulai sida tu meri awak ngagai sida ngintu pengerami Hari Gawai enggau diri sebilik kena 1 enggau 2 Jun tu ila.
“Nyema semua tu nadai penanggul lalu kami ngasika Prosedur Operasyen Standard (SOP) ti ditetapka Komiti Mutarka Penusah Ngenyit Nengeri Sarawak (JPBNS), nyengkaum bejalaika pengawa kuarantin dalam timpuh 14 hari, kami deka ulih pulai ngagai ruang bilik diri empu maya nyau deka Gawai Dayak,” ku iya ba KLIA kemari.
Louisa iya nya anak tuai ari tiga iku diri menyadi ari Sungai Plan, Bintulu iya nya siku nembiak ti belajar ba Kolej Matrikulasi Melaka.
Pengandal ati ti ulih pulai maya Gawai ke deka diintu enda lama agi tu mega sama diasaika bakih iya Concessa Kuek Augustine, 19, ti bebansa Bidayuh.
“Taja Gawai tu deka diintu dalam gaya ‘norma’ baru, tang andal ati kami ulih pulai betemu enggau diri sebilik ti dikesayau,” ku anak kedua ari dua iku diri menyadi nya.
Nitih ku Concessa ti mega belajar ba Melaka, keterubah nya iya nyangka diri enda tepulaika diri ari Semenanjung nyentukka udah Gawai laban gaya pandemik COVID-19 ti majak ngirauka ati.
Tang raban Kolej, Opis Menteri Pelajar, enggau kerejasama Rumah Sarawak di Kuala Lumpur, Sarawak Volunteers, JPBNS enggau Malaysia Airlines udah ngatur sereta ngemuntangka pengawa nganjung pulai sida seraban.
Siku aja nembiak ti besekula ba Kolej Matrikulasi Pulau Pinang, Joseph Nyangau, 19, mega madahka pemulai sida tu iya nya nyadika perais Gawai ti endang besai reti.
Iya ti penatai asal ari Rumah Jiram, Bintulu, iya nya anak ketiga ari enam iku diri menyadi lalu bebansa Iban madahka, ulih begulai enggau diri sebilik maya Hari Gawai taja pan diintu dalam norma baru, chukup besai reti ngagai iya enggau sida sebilik.
Direktor Rumah Sarawak di Kuala Lumpur, Awang Supian Awang Daud, udah nganjung pulai bala nembiak tu kemari lalu raban ari Rumah Sarawak tu mega udah ngagihka pemakai sereta ai irup ngagai sida, sebedau ti nepan bilun ari KLIA ke Bintulu.