KUCHING: Menteri Kandang Menua enggau Pengawa Berumah Dato Sri Dr Sim Kui Hian udah berandau nengah chara ‘online’ bekaul empas pandemik COVID-19 lalu ngelangkar pelin mulaika pemanah ekonomi enggau raban ti bekaul.
Ku iya, pandemik COVID-19 udah ngubah gaya idup komuniti kena ngemeranka ‘norma’ idup ti baru dalam industri enggau komersial.
“Pengawa berandau tu udah diatur begulai enggau Menteri Muda Dagang Temuai, Seni enggau Main Asal, Datuk Sebastian Ting, Presiden HuaZong Sarawak, Dato Richard Wee sereta Dewan Perniagaan dan Perindustrian Cina Bersekutu Sarawak (ACCCIS) Tan Jit Kee.
“Raban tu ngembuan tanggungpengawa ti berat dalam ekonomi sereta pemansang.
“Berindik ari nya, sida dipinta aku enggau berandau sereta meri buah penemu ti meransang ke ulih dikena dalam nusun perambu pemansang ekonomi tauka pekara bukai ti ulih nyungkak isu tu,” ku iya nengah siti penerang kemari.
Perintah Sarawak diatu udah madahka Atur Nagang Pemindah Bisi Penetap (PKPB) ti dilanjar enggau neritka Prosedur Operasyen Standard (SOP).
Beserimbai enggau nya, makai ba pak kupi, premis dagang pemakai tauka restoran enda dikemendar lalu sekeda sektor bukai mega enda dikemendar bejalaika operasyen.