KUCHING: Pansik ti dipejalaika nengah chara 'online' beratika responden tebal agi kakang ati sekalika nyanggup dituchuk vaksin AstraZeneca (AZ) COVID-19, lalu tebal agi sida bepenemu nya patut nyadi pilih rayat Sarawak.
Tinjau The Borneo Post Online berengkah ari 24 jam ke udah ti nanya responden sekalika vaksin nya dipilih rayat Sarawak nyema sida deka dituchuk vaksin.
Tinjau nya dipejalaika kena ngulihka timbal ari mensia mayuh sentang vaksin nya pengudah perintah Sarawak ngaga pemutus minggu nyin tadi enggai nerima vaksin AZ di nengeri tu, berindik ari pengirau ati mensia mayuh sentang penanggul ke tau nyadi nyengkaum beku darah.
Putrajaya dulu ari tu ngeluarka vaksin AZ ari Program Imunisasi COVID-19 Menua, tang deka meri vaksin nya nengah program volunteer ti dilancharka kena Hari Minggu nyin tadi di Lembah Klang, ke alai semua 268,000 slot semaya betemu nya diisi dalam timpuh tiga jam.
Berebak enggau nya, tinjau nya mega beratika setengah ari 1,024 responden tauka 52.7 peratus, deka dituchuk vaksin AZ, tang 69.3 peratus tauka 709 responden setuju nya patut nyadi pilih rayat Sarawak.
Siku pengajar ke enggau bejalaika tinjau nya madah, enda ngalitka ati nyema tebal agi responden deka agi enti vaksin AZ nyadi pilih rayat Sarawak.
"Ya, rayat Sarawak patut diberi pilih. Sida mega patut di beri lalau kelebih agi sentang utai ke tau nyadi pengudah dituc huk nya enggau risiko ke ditapi sida,” ku pengajar indu nya ti enggai nama iya dibantaika ditu.
Iya mega madah, mensia mayuh patut diajar sentang baka ni sida tau nyadi orang ke mai virus taja pan udah divaksin.
"Orang ke udah divaksin engka ngasaika diri chukup bepengerai tang ke bendar sida agi tau mai risiko ngagai individu ke bedau divaksin,” ku iya.
Siku responden bukai madah, mensia mayuh enda patut diasuh milih vaksin ti dikedeka ke sida laban sida tau milih nya nitihka pekara dibacha nengah online tauka 'Google'.
Eksekutif kompeni nya madah, penerang ke diulih sida nya engka enda engkeman.
Ku iya, mayuh netizen diatu ngaga pansik kediri nengah online sereta pechaya enggau asil nya sereta enda berandauka pekara nya enggau orang ke amat profesional.
"Atur ti ngemendarka rayat Sarawak betuchuk nya endang manah. Tang nyema bisi utai ke enda manah nyadi ketegal nya, deka enda kita nyalahka opis bekuasa ketegal ngemendarka Sarawak tau berejista?
"Empas nya balat sereta besai. Bisi mega rayat Malaysia bepenemu pengudah dituchuk vaksin, sida tau ngaga sebarang pengawa ti dikedeka ke sida,” ku iya seraya madah, vaksinasiyen nya ukai lisin kena ngereja sebarang utai sepeneka ati sereta tau enda nithka prosedur operasyen standard (SOP).
Nya alai, bisi mega penemu ngansak perintah Sarawak berundingka baru pemutus ke enggai nerima vaksin AZ di nengeri tu.
Siku ari nya, iya nya koordinator Komiti Mutar Penusah Ngenyit Bagi Menua Sibu, Dr Annuar Rapaee, ti meri langgur penemu ngambika vaksin AZ nyadi pilihan orang lunggar umur ti beumur 60 taun ke atas, enggau chara volunteer.
Ku iya, sesapa ti deka ke vaksin AZ, sia tentu deka dipadahka sentang pemaik enggau risiko nya.
“Vaksin AstraZeneca mesti diambi nengah chara volunteer lalu ukai dipejal.
“Di Kanada, orang keg berumur 60 taun ke atas deka dituchuk vaksin bansa tu lalu di United Kingdom, nya ungkup ke beumur ngelui ari 30 taun,” ku iya.
Vaksin COVID-19 ke diberi di nengeri tu diatu iya nya ari Pfizer-BioNTech enggau Sinovac.