SIBU: Sebuah ‘Pusat Sehenti’ COVID-19 deka ditumbuhka di Kapit kena nagang pengelekai penyakit nya di bagi menua nya.
Sapit Menteri Pengerai Datuk Aaron Ago Dagang madah, pemutus numbuhka palan nya diambi berindik ari penambah ngenyit kes COVID-19 di bagi menua nya diatu.
Ku iya, endur alai numbuhka palan nya deka diputuska pengudah betemu enggau ejensi perintah nyengkaum pengari rayat ba Pejabat Residen Kapit, pagila.
Pusat Sehenti COVID-19 begunaka kandang endur ti chukup besai laban deka endur engkah kaunter alai ngerejita diri enggau kaunter beperesa sereta ke bukai.
"Kami deka betemu enggau Opis Residen (Kapit), pengari rayat sereta semua ejensi (perintah) ke bekaul lalu nyiri siku orang ngaduka pengawa sereta ngintu palan tu," ku iya lebuh dirandau ditu kemari.
Aaron ke mega Kaban Parlimen Kanowit nya diatu benung dalam pejalai ke Kapit mantu numbuhka Sepital Medan Angkatan Tentera (ATM) enggau Pusat Sehenti COVID-19.
Ku Aaron, tujuan palan tu ditumbuh ngambika tau ngereja aktiviti ti bekaul enggau meresa sereta nyidi kes aktif (ACD).
"Orang ke patut diperesa tauka ditemu bisi kontak rsemak enggau pesakit tau datai terus ngagai Pusat Sehenti COVID-19 sereta tau enda ibuh ke sepital tauka klinik pengerai.
"Lutur deka ngaga semaya betemu enggau orang ke datai kin (Pusat Sehenti COVID-19)," u iya.
Ku Aaron, Pusat Sehenti COVID-19 ti deka ditumbuhka nya endang inisiatif Komiti Mutarka Penusah Ngenyit Nengeri (JPBN).
"JPBN mega benung merambu numbuhka palan nya ba tetiap bagi menua tang perengkaguna tu dikemerat ditumb uhka dulu di Kapit, Sibu enggau Bintulu," jku iyai.
Ku Aaron, Pusat Sehenti COVID-19 ti ditumbuhka ba Balai Mensia Mayuh Majlis Bandaraya Kuching Selatan (MBKS) nerima sambut ke amnah ari mensia mayuh.
Ku iya, enggau pemisi pusat sehenti tu, semua utai ke diguna nyengkau pengereja pengawa enggau perengka pengangkut ulih difokus ba siti endur kena mutarka penanggul suntuk pengereja pengawa enggau perengka pengangkut dikena ngemunaska pandemik COVID-19.