MIRI: ConocoPhillips Sarawak Ltd kemari ngenukuka semua 101 kru ke gawa ba rig pengebur Naga 7 ba kandang tasik Bintulu-Miri selamat sereta dibai ke Miri.
Kompeni nya nengah penerang berita ngagai Utusan Borneo madah, penusah rig pengebur Naga 7 ti karam ba kandang tasik Sarawak nyadi urung pukul 2.45 lemai ensana, lebuh benung ngebur telaga minyak ba blok Salam 3.
Rig nya urung 120 batu nautika ari Bintulu lalu urung 135 batu nautika ari Miri.
“Raban Ngesah Penusah Ngenyit kami udah dianjung (ke Naga 7) lalu raban ke bekaul bukai mega udah dipadahka.
“Pekara ti dikemeratka kamiiya nya pengelikun bala adalah kami lalu kami ngenukuka semua pekereja udah dipindahka ari Naga 7.
“Nadai orang bakal tauka pengerusak ngelingi nya,” pia ku penerang nya baru.
Berebak enggau nya, Menteri Perengka Pengangkut Sarawak Datuk Lee Kim Shin ke mega menteri megai tanggungpengawa ba Komiti Mutar Penusah Ngenyit Bagi Menua (JPBB) Miri, ngenukuka sida udah dipadahka sentang pekara nya lalu meri pemendar tekala nya ngagai semua 101 kru nya sangkai ba Offshore Transit Center (OTC) ditu.
“Tu kes penusah ngenyit ba tasik lalu kami meri pemendar ngagai sida sangkai di Miri (OTC).
“Baka dalam penetap ti ditetapka, semua 101 kru deka dilekatka gelang jari sereta diberi surat ngasuh mesti dikuarantin ari Opis Menteri Pengerai Malaysia (KKM) pengudah sangkai ba Penyangkai Kapal Miri,” ku Lee lebuh dirandau Utusan Borneo ditu, kemari.
Ku iya ari penyampau nya, raban keterubah 85 iku kru datai pukul 10 pagi kemari, 60 ari nya peranak menua ditu lalu enam iku agi peranak menua bukai lalu ke bukai nya ari nengeri bukai.
“Laluh 16 iku agi kru dipelabaka datai ba darat pagila (sehari tu), nitihka prosedur baka bala sida ke bukai.
“Aku berasai lantang ati laban semua kru rig nya selamat dalam insiden tu,” tambah iya.
Ku iya baru, ke smua 101 kru nya mega udah berengkah dikuarantin pengelama 14 hari ba palan kuarantin ti ditetapka kompeni nya empu, lalu semua ungkus nya mega ditanggung kompeni.
Lee madah, tebal agi pekereja ba rig Naga 7 nya peranak menua tu empu.
Nitihka padah ba Facebook Seafarer Life, insiden nya nyadi ketegal tiang penyanding nya nyauka patah ti ngujungka rig nya belelubah tengelam.
ConocoPhillips nengah penerang media kemari, ngenukuka rig pengebur Naga 7 nya udah tengelam magang pukul 7.45 pagi kemari.
Rig pengebur Naga 7 nya ulih ngebur nyentuk penalam 30,000 kaki, sereta beroperasyen ba penalam 375 kaki ari mua tasik.