SIBU: Perintah nengeri patut berunding baru ngena vaksin AstraZeneca COVID-19 ungkup orang lunggar umur ke berumur 60 taun ke atas ke deka nerima nitihka peneka ati sida.
Koordinator Komiti Mutar Penusah Ngenyit Bagi Menua Sibu (JPBBS), Dr Annuar Rapa’ee madahka data saintifik ke bisi mandangka potensial pemaik jauh ngelui ari risiko ke datai ari vaksin tu.
“Aku meri langgur penemu ngambika (Perintah Nengeri) ngena (vaksin AstraZeneca) ungkup orang ke beumur ngelui 60 taun, bepelasarka data sainstifik.
“Tang kitai patut ngena nya nitihka peneka ati diri ungkup orang lunggar umur ba raban tu, kelebih agi ba maya penyampau kes COVID-19 ninting hari ke mayuh di Sarawak diatu.
“Sapa pan (dalam raban umur tu) ti deka ke dituchuk ngena vaksin tu, sida tentu udah dipadahka sentang pemaik enggau risiko nya.
“Pengawa nuchuk vaksin AstraZeneca mesti dipejalai nitihka peneka ati diri lalu ukai dipejal,” ku Dr Annuar madah ngagai The Borneo Post, kemari.
“Entyi kita nanya ngagai aku, nama vaksin ti pemadu manah ungkup Sarawak, saku deka madahka vaksin ke pemadu manah ti keterubah endar disedia ke kita,” ku iya.
Iya ngenang pekara nya kena nimbal penerang Koordinator Program Imunisasyen COVID-19 Menua, Khairy Jamaluddin ti madahka Perintah Besai mengkang tebuka runding deka meri vaksin AstraZeneca ngagai Sarawak, nyama bisi berubah runding deka nerima nya.
Dr Annuar madahka tetiap ubat, sekalika vaksin tauka ubat, bisi risiko ke bekaul tang ke beguna amat iya nya potensial pemanah kena ngalahka risiko enggau meri empas ke manah ngagai semua kelebih agi maya pandemik COVID-19 diatu.
“Di Kanada, orang ke beumur 60 taun ke atas deka nerima vaksin bansa tu lalu di United Kingdom, tu mih ungkup orang ke berumur ngelui ari 30 taun.
“Ke beguna amat ari utai ti suah dipadahka aku, iya nya meri vaksin enggau naka pemayuh sereta enggau naka pengelengkas ngagai semua orang kena numbuhka raban imuniti ngagai virus tu,” ku iya.