KUCHING: Kaban Parlimen Selangau, Baru Bian minta Komiti Mutarka Penusah Ngenyit Nengeri Sarawak (JPBNS), berunding baru nerima vaksin COVID-19 AstraZeneca ungkup rayat nengeri tu.
Ku Baru, nya ngambika rayat Sarawak diberi pilih sebaka enggau rayat Malaysia ke bukai.
“Aku pechaya kitai ulih ngaga pemutus ke betul, lalu mayuh ke deka nerima vaksinasyen sida tumu agi.
“Penyadang mesti bisi kena nentuka orang ke udah ngerejista diri amat meretika risiko sereta ngaga pilih ke betul. Tang anang ngambi hak rayat ngambika tau milih kediri empu,” ku iya nengah penerang berita, kemari.
Iya ke mega Kaban Kaunsil Tetinggi Parti Sarawak Bersatu (PSB) madah, program milih deka ke vaksin AstraZeneca di Selangor enggau Kuala Lumpur mujur amat, ke alai semua 260,000 slot diambi dalam timpuh tiga jam ari maja ngerejista diri nya dibuka.
Ku iya, Menteri Koordinnator Program Imunisasyen COVID-19 Menua udah madahka Sarawak deka nerima vaksin tu ke dianjung ninting bulan dalam beberapa ke deka datai, lalu pemilih tu deka disediaka ungkup semua rayat Malaysia.
Ku Baru, taja pan mayuh rayat Sarawak madahka diri enggai dituchuk vaksin AstraZaneca, tang engka bisi berunding deka dituchuk nya pengudah berundingka risiko enggau pemaik nya.
Bekaul langgur penemu Sapit Kepala Menteri Datuk Amar Douglas Uggah Embas ti udah minta perintah besai meri vaksin siti dos iya nya, CanSino ngagai peranak menua pesisir ku Baru, nya amat praktikal.
“Nya praktikal ngaambika mensia mayuh enda ibuh dua kali ngagai palan vaksinasyen ngambi dua dos. Aku dipadahka vaksin tu patut datai berengkah ari bulan nyin tadi. Bisi enda vaksin CanSino tu udah datai,” ku iya.
Iya mega meri langgur penemu ngagai JPBNS ngambi berunding ngansuh opis pelilih menua bejalaika program ngerejista vaksinasyen begulai enggau ketuai raban bansa sereta negapka penemu rayat sentang pengelikun enggau penyemitan vaksin.
“Penyampau orang ngerejista diri ke mimit iya nya 55 peratus ari populasyen ke tau divaksinasyen mandangka mensia mayuh nangi divaksin.
“Aku minta peranak menua pesisir ngerejista diri ngambika kitai ulih nyapai raban juluk nyadi raban imuniti enggau jampat,” ku iya.