Anda di sini

PH Sarawak bela ngansak aum DUN diatur alai berandauka isu meli vaksin

Advertisement
(Kiba) ABANG ZULKIFLI ngau HUD ANDRI
(Kiba) ABANG ZULKIFLI ngau HUD ANDRI

KUCHING: Pakatan Harapan (PH) Sarawak nyukung penuh sereta setuju enggau jaku ansak Chairman Parti Tindakan Demokratik (DAP) Chong Chieng Jen, ngambika aum Kunsil Nengeri (DUN) diatur alai berandauka isu Perintah Sarawak ke deka meli vaksin

Sapit Chairman Kaunsil Ketuai Nengeri Parti Keadilan Rakyat Sarawak (PKR) Abang Zulkifli Abang Engkeh madah, meli vaksin nya begunaka belanja ti mayuh lalu sebarang pemutus ke digaga Gabungan Parti Sarawak (GPS) patut dipejurai sereta dikemendarka dalam DUN.

“Taja pan PKR nyukung penuh juluk ati perintah deka meli vaksin COVID-19 kediri ngambika ulih ngenyampatka proses vaksinasyen ungkup rayat Sarawak.

“Taja pia, perintah enda tau sepeneka ati ngena belanja sereta melakangka rayat nengah kebuah ngena undang-undang emerjensi. Utai ke dipeda kitai diatu, proses vaksinasyen di Sarawak lubah amat,” ku iya madah ngagai Utusan Borneo kemari.

Berebak enggau nya, iya minta rayat Sarawak majak nya pengerai enggau pengelikun diri kelimpah nitihka prosedur operasyen standard (SOP) ti ditetapka.

Sapit Chairman Parti Amanah Negara (AMANAH) Nengeri Sarawak Hud Andri Zulkarnaen madah, pengawa perintah Sarawak meli vaksin endang ke pemaik rayat ti patut dikerandau enggau semua ADUN ekalika sri sepiak perintah tauka penyakal.

“Bansa vaksin ke deka dibeli enggau penerang silil sentang penyemitan vaksin nyengkaum rega nya patut dipejuraika dalam DUN ngambika semua ADUN tau mantaika penemu diri lalu ngiga chara ke pemadu manah.

“Vaksin ti disetuju nya tau diberi ADUN ngagai rayat ngambika nadaipenemu negatif sentang nya, ku iya.

Ku Hud, enti semua nya enda nyengala, nya tau nempa peragam  negatif ba rayat nyema bisi utai  enda manah nyadi.

“Nya alai, AMANAH Sarawak ngamsak siti aum khas DUN Sarawak perlu diatur alai berandauka isu meli vaksin tu,” ku iya.

Kena 2 Mei, Chong nengah ‘live’ ba Facebook  madah, aum DUN Sarawak  patut diatur kena madahka rayat Sarawak baka ni perintah nengeri deka meli vaksin nya kediri nyengkaum proses program imunisasyen COVID-19 renggat negeri.

Advertisement