KUCHING: Chairman Parti Tindakan Demokratik (DAP) Sarawak Chong Chieng Jen dipadahka semina ngiga publisiti murah lebuh ke minta aum Kunsil Nengeri (DUN) diatur alai berandauka isu perintah Sarawak dek meli vaksin COVID-19.
Mandal Presiden Parti Pesaka Bumiputera Bersatu (PBB) Datuk Abdul Karim Rahman Hamzah madah,Chong semina deka mandangka diri beratka pengelantang pendiau rayat.
“Nyadi Kaban Parlimen enggau Kaban Kunsil Nengeri,Chong patut nemu ngatur aum DUN ukai baka ngatur aum serakup tauka kelab ti tau diatur sebarang nya.
“Aum DUN begunaka notis abis nadai 28 hari sereta mesti nganjung mayuh dokumen ke bekaul ngagai bala ADUN,” ku iya dirandau Utusan Borneo kemari.
Ku Abdul Karim, iya (Chong) nemu timpuh penggal DUN Sarawak ke abis kena 6 Jun tu.
“Nya alai, enda patut ba ADUN enggau pengawa nyadung notis ti disediaka. Ulah Chong tu semina deka ngiga publisiti murah lalu mandangka diri baka ngaga diri beratka pengelantang pendiau rayat,” ku Abdul Karim ke mega Menteri Dagang Temuai, Seni enggau Main Asal.
Chong lebuh ke ‘live’ nengah Facebook kena 2 Mei madah, DUN Sarawak mesti baum berandauka isu meli vaksin COVID-19.
Ku iya, baka ni Sarawak deka meli kediri vaksin COVID-19, nya patut dikerandauka ba aum DUN lalu rayat mesti dipadahka sentang program imunisasyen COVID-19 renggat nengeri.
“Mayuh amat pemekal (vaksin COVID-19) seperti Pfizer, Sinovac, CanSino, Moderna, Spunik enggau AstraZeneca lalu perintah nengeri madahka enda ngena AstraZeneca.
“Tebal agi pemekal bejalaika dagang nya enggau mayuhmenua enggau penyampau (vaksin) ke dijual endang mayuh, ulih enda Sarawak enggau ‘berebut’ meli (vaksin)? Rega nya siti pekara laban sekeda pemekal nyual ngagai orang ti ngeletakka rega ke tinggi.
“Semua tu mesti dipadah ngagai rayat ngambika kitai semua nemu nyemetak. Kami ulih meri kerejasama penuh,” ku Kaban Parlimen Stampin nya.