KUCHING: Sapit Kepala Menteri Datuk Amar Douglas Uggah Embas madahka 'Pusat Sehenti COVID-19' Bagi Menua Kuching bepalan ba Balai Komuniti Kuching di Jalai Padungan ditu deka berengkah bejalaika operasyen sehari tu.
Nengah Unit Komunikasyen Perintah Sarawak (UKAS) madahka iya nyebut tu iya nya inisiatif perintah nengeri kena ngelengkaska pengawa nyidi kontak semak kes COVID-19 kelebih agi di bagi menua tu lalu tu iya nya projek ti keterubah enggau tuju nngengkahka semua opis sereta staf ti bekaul dalam operasyen ngelaban pandemik tu.
“Tu iya nya Pusat Sehenti ti keterubah ke ditumbuhka kitai di Sarawak lalu tu iya nya projek ti keterubah endur ngengkahka semua opis enggau staf ti bekaul dalam operasyen ngelaban COVID-19.
“Tu mega nyengkaum Opis Pengerai Nengeri Sarawak, Dewan Bandaraya, Polis DiRaja Malaysia (PDRM), Raban Soldadu Malaysia (ATM), Raban Penyaga Pengelikun Periman Malaysia (APM), Opis Residen, Opis Volunteer Malaysia (RELA), Unit Pengelikun enggau Penerit Adat Nengeri (UKPN) enggau Opis Kereja Raya (JKR),” ku iya lebuh ti ditemu pengudah ngelawa ke palan nya kena Hari Enam tu tadi.
Uggah ke mega Chairman Komiti Mutarka Penusah Ngenyit Nengeri Sarawak (JPBNS) madahka iya ngarap enggau inisiatif tu, semua pengawa ngatur kes COVID-19 tu ulih dikemanahka agi.
“Kitai ngarap sebuah palan ti dikena nentuka semua pengawa ngatur kes COVID-19 tu ulih dikemanahka lalu pengawa nyidi kontak ulih digaga enggau lengkas,” ku iya.
Sama bisi nyempulang Uggah maya pengawa nya, Menteri Kandang Menua enggau Pengawa Berumah Dato Sri Sim Kui Hian, Direktor Opis Pengerai Nengeri Sarawak Dr. Chin Zin Hing sereta pemesai kanan perintah ke bukai.