KUCHING: Parti Sarawak Bersatu (PSB) udah nyendiaka siti pelin mulaika pemanah ekonomi pengudah COVID-19 kena mantu rayat nengeri tu ti kena empas ketegal pandemik tu.
Presiden PSB Dato Sri Wong Soon Koh madahka pelin tu deka dipadahka maya Pengawa Bepilih Nengeri (PRN) ti deka diatur sebarang maya.
“Kami deka nyaga pengidup enggau ekonomi, pengawa enggau pemujur rayat jemah ila. Kami deka meri bantu belanja ngagai semua sektor lalu deka mantu industri mit enggau tengan pemesai (PKS).
“Kami nemu perintah udah meri kelala sekeda bantu lebuh pandemik tu, tang aku ngasaika nya enda umbas kena mantu ekonomi kelebih agi dalam ngetanka kereja, penatai pemisi enggau dagang ungkup rayat,” ku iya.
Iya madah munyi nya lebuh ti bejaku maya bejadika Program Licha Raban Nembiak PSB kemari ti dipejalaika nengah platform Zoom.
Ku Wong nambah, perintah patut ngaga enggau manah agi dalam nagang enggau ngatur COVID-19.
Ari baruh Komiti Mutarka Penusah Ngenyit Nengeri Sarawak (JPBNS), ba renggat perintah besai ku iya bisi mayuh raban ti ngaga pemutus, bisi nya Opis Menteri Pelajar, Opis Menteri Pengelikun, Opis Menteri Pengerai, polis enggau ke bukai agi.
“Aku ngasaika kitai di renggat nengeri bisi hak autonomi ngaga pemutus bekaul chara ti diambikena nagang pandemik tu ngelekai.
“Di renggat nengeri kitai bisi opis pelajar, pengerai, komiti penusah ngenyit lalu aku ngasaika udah maya nya ktai ngaga pemutus kediri empu laban kitai nemu nama ti pemadu manah kena nagang penyakit tu di Sarawak.
“Pandemik tu mai ngagai penanggul lalu kitai patut bisi autonomi kena nagang pandemik tu,” ku iya.
Wong mega muji bekaul bantu khas RM500 ari Kepala Menteri ngagai orang gawa perintah.
Berindik ari nya iya ngarapka chara bukai deka diberi kelala kelebih agi kena mantu rayat di menua pesisir ti ngena gaji hari.
Bekaul PSB, Wong madahka parti ti berengkah ditumbuhka enggau mayuh macham penanggul lalu sepengudah dimunka, parti tu nerima sukung ti endang ngemuaska ati ari selampur Sarawak ti ngaul semua pupu raban bansa.
Kebuah pia ku iya madah ti meransang iya ngelengkaka tanggungpengawa nyadi menteri kabinet kena bulan Ogos 2019 kena nyadi sebuah parti ti ngatika diri.
“Aku udah ngelawa ke selampur nengeri tu ari Selatan nyentukka Utara lalu sambut orang ngagai PSB endang diterima manah nyengkaum ari Orang Ulu, Melayu, Melanau, China, Bidayuh enggau Iban.
“Tu ngayanka rayat dekaka ubah lalu ulih dipeda sentimen ngagai pengawa ngaga ubah endang agi teguh kini pan aku bejalai,” ku iya.