Anda di sini

Dua kes pemati, 587 kes baru positif COVID-19

Advertisement

KUCHING: Sarawak kemari ngerikod dua pemati sereta 587 kes baru COVID-19, ku penerang ti dipansutka Komiti Mutarka Penusah Ngenyit Menua Sarawak (JPBNS).

JPBNS madahka kes pemati ke-181 nya bekaul enggau siku indu ke ditemu luput di rumah ari sida sebilik kena 25 April tu tadi lalu di taban ngagai sepital Mukah. Kes nya lalu ngujungka indu nya parai.

“Sebedau tu, kes nya bisi mandangka indu nya bisi simptom batuk lalu enggai makai dalam pengelama tiga hari lalu nangkanka nya, iya bisi ngasaika diri pedis deka enseput.

“Pansik ke silik agi ti di gaga opis Forensik di sepital ngesahka niang parai ketegal COVID-19, lalu ari peresa rT-PCR ke di gaga ba niang nya ngesahka iya positif kena April 29,” ku komiti JPBNS.

Indu 82 taun nya ngembuan penyakit komorbiditi baka darah tinggi enggau diabetes lalu bisi kaul enggau kes Kluster Sungai Nirai di Selangau.

Nangkanka nya, kes pemati ke-182 iya nya kes ke-30,982 bekaul enggau siku indu ke berubat di Sepital Sibu laban bisi penanggul pedis deka enseput.

Indu ke berumur 88 taun nya sebedau tu bisi napi penanggul seruran mutah lalu berasai lelak. Gaya pendiau iya udah nya enda tentu manah ngujungka iya parai kena 1 Mei 2021.

Kes nya ngembuan ko-morbid penyakit tungkul ati, darah tinggi enggau diabetis.

Enggau tu penyampau kes pemati ketegal COVID-19 nyengkaum dua pemati baru tu nambahka penyampau pemati di nengeri tu naka kediatu udah manggai 182 kes.

Kelimpah ari nya, 67 peratus ari kes positif ke nyadi kemari ditemu di pelilih menua Mukah, Bintulu, Sibu, Kanowit enggau Kuching.

Pelilih menua Mukah ngerikod kes ke pengabis besai, iya nya 175 kes baru, ke alai 95 peratus kes nuntung sida ke diau di rumah panjai ke ditemu nengah pengawa Nyidi Kes Aktif (ACD) sereta meresa kontak semak ngagai kes positif ke bisi bekaul enggau rumah panjai ti kena pentin PKPD.

Pelilih menua bukai ke ditemu bisi ngerikod kes positif iya nya di pelilih menua Mukah (175), Bintulu (61), Sibu (57), Kanowit (56), Kuching (45), Kapit (37), Miri (30), Sri Aman (25), Sebauh (20), Song (14), Pakan (9), Serian (8), Meradong (7), Subis (7), Bau (6), Betong (5), Beluru (5), Tebedu (4), Lundu (4), Tanjung Manis (3), Matu (2), Samarahan (2), Tatau (1), Marudi (1), Julau (1), Dalat (1) sereta Simunjan

Lalu tu ngujungka penyampau semua kes bisi udah nambah ngagai 31,691 kes.

“Ari 587 kes baru ke bisi di ripot, urung 47 iku bisi mandangka tanda kena rampit penyakit COVID-19 maya sida kena peresa.

“Lalu pia mega, urung 523 iku udah kenakuarantin,” ku penerang nya.

JPBNS mega madahka naka kemari bisi 472 kes baru di serata menua ke udah gerai lalu dikemendarka pansut ari sepital.  

Kelimpah ari nya mega, 587 iku orang ke dipelaba (PUI) ke baru bisi di ripot ngagai komiti lalu pia mega, ke diatu, nadai PUI ke agi nganti pemutus ari makmal.

Advertisement