BINTULU: Atur Nagang Pemindah Bisi Penetap (PKPB) prosedur operasyen standard (SOP) diteritka agi ungkup Bagi Menua Bintulu diseririska enggau SOP ti dipejalaika Komiti Mutarka Penusah Ngenyit Nengeri Sarawak (JPBNS) di selampur nengeri tu berengkah 27 April nyentuk 17 Mei.
Residen Bagi Menua Bintulu ti mega Chairman JPBB Bintulu Jack Aman Luat madah, sebedau tu udah netapka 10 Mei tang diubah ngagai 17 Mei ngambika sama enggau PKPB di selampur Sarawak.
Ku iya, entara pekara ti dikemerat dalam SOP tu (ungkup Bintulu) iya nya mesti ngaga peresa COVID-19 (rT-PCR) sebedau mindah sekalika tama tauka pansut ari Bintulu ngagai zon bukai.
Pia mega, ku iya, tu enda nyengkaum ba sekeda kes ngenyit, atur semaya enggau sepital (berubat) sereta pengawa nyengai pemati.
Ku iya, bepelasarka SOP nengeri, pemindah entara bagi menua (zon) agi bedau dikemendar kelimpah ari servis ti berat aja.
Isu enda ngemendarka ba palan mensia mayuh pengudah pukul 8 malam mega ku iya, sebarang individu enda dikemendar ba palan mensia mayuh pengudah pukul 8 malam ti nadai kebuah tauka tuju ti patut.
“Tu mesti dititihka, nyema enda ngasika tu ulih kena tinggang ukum lalu servis ti berat ti dikemendarka mindah baka selama tang patut bisi surat ari pengaji kena ngesahka pengawa ungkup kereja syif sereta ke bukai,” ku iya dalam aum media ba Bilik Aum Sri Bintulu Opis Residen Bagi Menua Bintulu lemai kemari.
“Aktiviti jalai pengarap di masjid enggau surau (solat terawih) mega agi dikemendar bepelasarka ngagai jaku tangkan ari raban bekuasa jalai pengarap.
“Sida ti pulai ari masjid pengudah pukul 8 malam, enda disaman kitai laban sida bisi kebuah ba masjid,” ku iya nambah.
“Nama ti dikemataka kitai iya nya sida ti dedayau ke nadai kebuah sereta tuju.
“Pengawa matau enggau rat deka digaga ba genturung pendiau ke alai kitai nyemetak enda ngemendarka peranak ngatur aktiviti rama dalam kandang endur nya,” ku iya.
Kelimpah ari nya, ku iya nambah, komiti khas deka ditumbuhka kena ngemuntangka sida ngambi pesakit sereta nyidi sida ti positif kes ke alai pengawa tu mega deka dibantu raban polis kena mai pesakit ari palan endur sida berumah ke Palan Kuarantin enggau Berubat COVID-19 Risiko Baruh (PKRC) enggau sepital.
“Kitai ngarapka ulih ngurangka kes enggau penanggul enda ulih nyidi pesakit (positif COVID-19) enggau ke bukai nya ulih diputarka,” ku iya nambah.
Bekaul gaya di PKRC ku iya, kitai deka ngatur pengawa matau di kandang endur nya (PKRC) ngambika nadai pesakit ti ngelanggar atur ba alan kuarantin nya.
Ku iya, naka diatu kitai bisi 10 PKRC ti chukup nangkup pesakit taja penyampau sida mayuh asil ari pengawa nyidi kes aktif (ACD).
“Kitai enda ngena sekula nyadi PKRC (mensia mayuh) kelebih agi bisi sekula ti ngerikodka kes positif ke alai palan nya terus nyadi palan kuarantin ungkup raban sekula nya,” ku iya.
Iya madah, opis pelilih menua udah disuruh ngemansutka notis lalu semua pemesai opis pelilih menua deka madah ngagai ketuai komuniti enggau ketuai bansa sereta Komiti Pemansang enggau Pengelikun Genturung Pendiau (JKKK) bekaul nama ti patut digaga dalam ngasika SOP ba palan sida.
“Kitai enda kakang ati ngukum ketuai bansa nyema sida bejalaika pengawa, kitai nyemetak madah ngagai sida ngambika pekara tu (enda ngasika SOP) nadai nyadi agi,” ku iya.
Sama bisi Pemesai Opis Pengerai Bagi Menua Bintulu Dr Melvin Chung, Direktor Sepital Bintulu Dr Davis Johnraj sereta Menijer Besai Kanan Sarawal Gis Pemansang Aset Malaysia enggau Produk Keterubah PETRONAS Carigali Sdn Bhd Peter Majid.