SRI AMAN: Komiti Mutarka Penusah Ngenyit Nengeri (JPBN) udah ngemendarka sebuah agi Palan Vaksinasi Baru di Kompleks Lumba enggau Main Lubok Antu, pia ku Menteri Muda Pengelantang Komuniti Sarawak Datuk Francis Harden Hollis.
Nitih ku iya, palan nya dipelabaka deka bejalaika operasyen kena tengah bulan Mei taun tu.
“Nyadika siti ari chara kena ngemuntangka mensia mayuh ti udah sedia kena vaksin, JPBB Sri Aman maya aum nyin kemari nengah aplikasyen ‘Zoom Meeting’ begulai enggau JPBN udah ngemendarka palan vaksinasi baru nya ti dipelabaka berengkah bejalaika operasyen kena tengah bulan Mei taun tu,” ku iya.
Harden ke mega Kaban Kunsil Nengeri (ADUN) Simanggang madah munyi nya lebuh ti ditemu maya betemu enggau Chairman JPBB Sri Aman ke mega Residen Bagi Menua Sri Aman Indit Banggai bekaul enggau Program Tuchuk Vaksin Menua di Bagi Menua Sri Aman, Program Vaksinasi ti udah masuk ba Renggat 2 di Opis Residen Sri Aman kemari.
Ku Harden, ungkup renggat kedua, program vaksinasi tu mekuh ngagai raban ti beumur 60 taun ke atas ti dalam kategori raban ke bisi risiko tinggi lalu sekeda ari individu sukung ngagai Raban Terabai Menua ti udah dirintai ngulihka tuchuk nya.
Iya ti mega Penyanding Penemu JPBB Sri Aman madahka, Bagi Menua Sri aman nyuluk 87,000 iku diberi tuchuk vaksin beraban lalu juluk tu diambi ari penyampau peranak enggau merambu 106,000 iku ti ngira sida 18 taun ke baruh sereta sida ti enggai dituchuk vaksin,” ku iya nerang.