Anda di sini

Bansal nyual pemakai ba mua rumah di Allamanda udah diperesa

Advertisement
 Dr Emmanuel Joseph nyuaka brosur enggau garis lalau bekaul pemeresi sereta pengelikun pemakai ti disediaka ari rumah ngagai bala pedagang ti diperesa sida.
KEMERANKA MIH: Dr Emmanuel Joseph nyuaka brosur enggau garis lalau bekaul pemeresi sereta pengelikun pemakai ti disediaka ari rumah ngagai bala pedagang ti diperesa sida.

SARIKEI: Bisi 12 bansal nyual pemakai ba mua rumah di genturung pendiau Allamanda ditu udah diperesa, lemai kemari.

Aktiviti meresa nya udah digaga raban ti bekuasa iya nya ari Opis Pengerai Bagi Menua Sarikei, Opis Menteri Dagang Dalam Menua enggau Pekara Penguna (KPDNHEP)Sarikei enggau Opis Kaunsil Pelilih Menua Sarikei (MDS).

Ketuai Pampang KPDNHEP Sarikei Mohamad Zawawi madah, tuju pengawa matau sereta meresa tu iya nya kena nentuka pedagang barang pemakai ngemeranka penemu bekaul enggau pemeresi sereta pengelikun pemakai ti disediaka ari rumah tauka dikumbai 'home-based food'.

“Pengawa tu iya nya kena ngangkatka pechaya bala penguna bekaul tikas pengelikun pemakai sereta meri jaku tangkan ngagai pedagang ngengkahka tanda rega ba barang tauka pemakai ti diayanka ke dijual ngagai mensia mayuh.

“Kelimpah ari nya, pengawa matau enggau meresa tu iya nya kena nentuka pedagang ti bejalaika pengawa dagang maya bulan Ramadhan di rumah tu nitihka prosedur operasyen standard (SOP) maya timpuh Atur Nagang Pemindah Bisi Penetap (PKPB) ti dilanjar,” ku iya madah ngagai media ditu, kemari.

Sama bisi datai maya pengawa matau enggau meresa tu iya nya Pemesai Opis Pengerai Bagi Menua Sarikei Dr Emmanuel Joseph Fong Tsung enggau pengari ari MDS.

Bejaku bekaul enggau pengawa meresa nya, Muhamad madahka bisi sekeda pedagang udah ditemu ngaga mayuh macham penyalah.

“Entara penyalah ti nadai ngasika ditemu maya pengawa matau tu iya nya bisi lalat ti mayuh dalam bansal pemakai mua rumah tauka tisi jalai, pemakai enda ditutup lalu kena asap sereta keresik.

“Kelimpah ari nya, penyelap endur nyimpan ai tebu ti enda sama lalu ais udah lela semanjai ai nya disimpan sereta ngena surat berita nutup pemakai ti terus diempa.

“Sama bisi ditemu iya nya nadai disediaka palan endur nuchi jari ti patut, pedagang bedau nyereta kus latih ngintu pemakai lalu enda nerima tuchuk anti-tifoid,” ku Mohamad.

Iya mega nambah, bisi sekeda pedagang ditemu enda ngena selapuk tauka penangkup pala, apron enggau kasut ti betutup, sida ti bejual mega bisi ngena kereban pengias diri sereta pemeresi kukut.

Pia mega, ku Mohamad, pemakai disumai kelalu tumu iya nya lebih ari empat jam.

“Beserimbai enggau tu, jaku tangkan sereta lalau udah diberi pemesai ari ejensi ti bekaul kena pedagang nyual pemakai ngangkatmanah servis,” ku Mohamad nyemetak.

Sebarang tanya bekaul pemakai ti disediaka di rumah ulih ngambi garis lalau peminta ngerintai pedagang pemakai ti dijual ba rumah (home-based food) nengah laman web http://fsq.moh.gov.my tauka betelefon ngagai Opis Pengerai Bagi Menua Sarikei ba lumur 084-651086 lalu nyema bisi penyalah digaga pedagang ulih betelefon ngagai Opis Menteri Dagang Dalam Menua enggau Pekara Penguna Sarikei ba lumur 084-657752 tauka telefon ngagai MDS ba lumur 084-651201.

Advertisement