KUCHING: Dianggarka 1.2 juta tauka 55 peratus rayat Sarawak udah ngerejista diri dituchuk vaksin COVID-19, pia ku Menteri Kansil Kandang Menua enggau Pengawa Berumah, Dato Sri Dr Sim Kui Hian.
Dr Sim nengah utai ke ditulis dalam Facebook iya kemari madah, 2.2 juta rayat Sarawak tau dituchuk nengah Program Imunisasyen COVID-19 Menua (PICK).
"Urung 868,000 rayat Sarawak dalam data MySejahtera lalu 250,000 nyentuk 300,00 iku ngerejista diri nengah chara manual (pengudah meresi data ungkup salin kedua) lalu engka pemadu mayuh 1.2 juta rayat Sarawak udah ngerejista diri (55 peratus)," ku iya.
Ku iya bedau lama udah, sekali agi vaksin COVID-19 ti dianjung ninting minggu nitihka atur ungkup PICK datai ba Kuching.
"Kami meri terima kasih ketegal bisi kerejasama manah entara Opis Menteri Pengerai Malaysia (KKM) enggau Raban Pengereja Pengawa Imunisasyen COVID-19 (CITF).
"Sarawak deka majak negika hak bekunsi ari baruh PICK sereta nguji ngiga alternatif kediri empu," ku Dr Sim.
Ku iya, laban majak mayuh bansa vaksin enggau dos di Malaysia berengkah ari bulan Mei tu enggau nangkanka nya, Sarawak sedia nambahka penyampau (nyentuk 50,000 betuchuk sehari) ba kedua-dua palan nyaga pengerai peribit enggau perintah.
Ku iya, nya chara ke betul kena ngenyukupka vaksin ungkup rayat Sarawak ti tau ngerejista diri nyerumba bulan Ogos.
Sentang atur maya betuchuk dos, Dr Sim madahka vaksin bansa Pfizer pengudah dos keterubah, tiga minggu udah nya diberi dos kedua, lalu vaksin Sinovac (pengudah dos keterubah, empat minggu diberi dos kedua).
Ungkup vaksin AstraZeneca (pengudah dos keterubah, tiga bulan udah nya baru diberi dos kedua), vaksin Cansino (semina siti dos) lalu vaksin Sputnik (dua dos).