SIBU: Projek infrastruktur Ejensi Pemansang Ulu Rajang (URDA) ti ngaul Jalai Ngungun/Jagau semanjai 10.8 kilometer diatu benung dalam proses digaga.
Opis Pemansang Koridir Kandang Menua (RECODA) ti mega ejensi opis berkanun perintah Sarawak sereta megai tanggungpengawa ngagai URDA madah, jalai belakin nya deka nyambungka Nanga Rirok enggau Nanga Bat ba semanjai Sungai Ngemah.
“Projek tu mega ngaul pengawa ngaga dua jematan Bailey.
“Pengawa mansik sereta nasat strktur tanah nyau deka tembu lalu pengawa ngaga kelebih agi meresika taba udah berengkah dipejalai.
“Projek tu mega dipelabaka tembu taun nyin ila,” ku RECODA nengah penerang di Facebook rasmi opis nya kena Hari Satu nyin tadi.
Beserimbai enggau nya, perambu ngaga jalai alun tu keterubah nya dipadahka ex Menteri Besai Datuk Seri Najib Tun Razak lebuh ti ngelawa ke Rumah Penghulu Ugap Serib (diatu Rumah Mathew Chuat) di Nanga Tada, Kanowit kena bulan Februari 2010.
Keterubah nya Najib udah ngemendarka agih belanja sepenyampau RM8 juta ungkup projek tu.
Taja pia, kena 27 Mac 2016 lebuh ti ngabas kimpin pengawa bepilih ke Rumah Taboh Rimau di Nanga Ngungun, Najib udah ngemendarka RM50 juta agi nambah ungkup projek ti sama.
Taja pia, pengawa ngaga perojek nya bedau dipejalai.
Kebuah tu mih ti meransang tiga bagi Parti Keadilan Rakyat (PKR) iya nya bagi menua Kanowit, Lanang enggau Sibu udah ngeripot ngagai Opis Nagang Penyalah Makai Suap Malaysia (SPRM) bekaul agih belanja RM50 juta tu kena 22 Jun 2018.
Ketuai komuniti Ngemah Ili Penghulu Juni Masam madahka, bepelasarka penerang ti ditemu iya bekaul jalai tu digaga dalam dua renggat.
“Renggat keterubah iya nya ti benung dipejalai ari Nanga Bat nyentuk ke Sungai Pra.
“Duit pampas tanah ungkup pengempu tanah mega udah dibayar.
“Nangkanka nya, renggat kedua diteruska ari Sungai Pra ke Baluh, Serait, Sugin, Entungun, Wong Entekai, Kapit lalu terus ke Nanga Jagau.
“Lebuh ti tembu amai ila, jalai tu deka meri akses ti patut ungkup 21 buah rumah pajai Nanga Jaghau lalu enda kurang 20 rumah panjai di smenjai Sungai Ngemah,” ku iya lebuh ti ditanya kemari.
Nanga Jagau iya nya kandang endur berumah baru ti ditumbuhka kena 2 April 1972 ari baruh Kawasan Keselamatan Rajang (RASCOM) ke nadai agi beoperasyen diatu, ti nyadi strategi kena ngelaban komunis maya nya suba.
Diatu, peranak Nanga Jagau ngena jalai batang sereta perengka pengangkut sungai nyema deka ke pasar.